Qurylys qaldyqtaryn qoqys jáshigine tastaýǵa bola ma
ASTANA. KAZINFORM — Páterdi jóndeý kezinde shyqqan qurylys qaldyqtaryn aýladaǵy qoqys jáshikterine tastaý zań talaptaryna qaıshy keledi. Zańger Baqtııar Kárim mundaı qaldyqtardy qalaı durys shyǵarý keregin jáne talapty buzǵandarǵa qandaı jaýapkershilik qarastyrylǵanyn Jibek Joly telearnasynyń «Búgin LIVE» baǵdarlamasynda túsindirdi.
Zańgerdiń aıtýynsha, qurylys qaldyqtary turmystyq qoqystan bólek sanatqa jatady.
— Beton, kafel, sylaq sııaqty qurylys qaldyqtary qoqys konteınerleriniń tez tolýyna, qoqys tasymaldaıtyn tehnıkanyń buzylýyna jáne sanıtarlyq talaptardyń saqtalmaýyna sebep bolady. Sondyqtan zańnamada turmystyq jáne qurylys qaldyqtary jeke qarastyrylady, — dedi Baqtııar Kárim.
Onyń sózinshe, jóndeý jumystarynan keıin shyqqan qoqystardy azamattar arnaıy kompanııa arqyly nemese polıgonǵa jeke kóligimen aparýǵa bolady.
— Eń bastysy qoqystardyń polıgonǵa jetkizilgenin rastaıtyn qujat nemese túbirtek bolý kerek. Al turǵyn úıdiń qoqys konteınerleriniń janynda qurylys qoqystaryn ýaqytsha saqtaýǵa bolmaıdy. Tek turǵyn úı ákimshiligi arnaıy oryn bólip, jeke konteıner qoıǵan jaǵdaıda ǵana qysqa merzimge ruqsat etiledi, — dedi zańger.
Baqtııar Kárim mundaı quqyqbuzýshylyq úshin birneshe ákimshilik bap qoldanylýy múmkin ekenin atap ótti.
— Mundaı jaǵdaıda Ákimshilik quqyqbuzýshylyq týraly kodekstiń 505-baby, 344-baby jáne 434-2-baby qoldanylýy múmkin. Eger dál osyndaı quqyqbuzýshylyq bir jyl ishinde qaıtalansa, aıyppul mólsheri eki ese artady, — dedi ol.
Aıta keteıik, buǵan deıin, Astanada abattandyrý talaptaryn buzǵandarǵa 57 mln teńgeden astam aıyppul salynǵany jaıly jazǵan edik.
