Qurylys ınjenerlerin sertıfıkattaý qyzmeti básekelestik ortaǵa beriledi – jańa kodeks jobasy

ASTANA. KAZINFORM – Búgin Parlament Májilisinde jańa Qurylys kodeksiniń jobasy men oǵan ilespe zań jobasy tanystyryldy.

«Kodeks jobasynda tsıfrlandyrý máselelerine erekshe nazar aýdaryldy. Bul rette, jobalaý aldyndaǵy daıyndyqtan bastap nysandy paıdalanýǵa berýge deıingi qurylystaǵy qyzmettiń barlyq salasyna áser etetin derbes baǵyt retinde aıqyndaldy. Sonymen, e-Qurylys aqparattyq júıesiniń alańynda qurylys obektisiniń tsıkliniń barlyq kezeńderi qarastyrylady. Onda negizgi ekpin qurylys kezeńinde qoıylady. Munymen qosa, dál osy alańda testileý rásimi – qurylys salasynyń mamandaryn sertıfıkattaý jáne tizilimdi avtomatty túrde engizý júrgiziledi», - dedi QR Ónerkásip jáne qurylys vıtse-mınıstri Tımýr Qaraǵoıshın.

Onyń aıtýynsha, tsıfrlandyrý jumysy aıasynda zańnamalyq turǵyda jobalaý jónindegi jumystardyń sapa deńgeıin arttyrýdy qamtamasyz etýge tıis qurylys obektileriniń aqparattyq modeldeý mindeti bekitilgen.

«Sarapshylardy jáne ınjenerlik-tehnıkalyq qyzmetkerlerdi attestattaýdyń qoldanystaǵy júıesi sarapshylardyń dárejesin jetkilikti deńgeıde kórsetpeıdi. Halyqaralyq tájirıbeni qarastyryldy. Bul rette, ulttyq zańnamanyń ereksheligin eskere otyryp, Evropa odaǵynyń tájirıbesine sáıkes qurylys salasynyń ınjenerlerin sertıfıkattaýdy engizý josparlanyp otyr. Sertıfıkattaýdy júrgizý jónindegi fýnktsııa básekelestik ortaǵa beriledi jáne naryq qatysýshylary arqyly júzege asyrylady. Budan basqa, qurylys salasyndaǵy erejeni óreskel buzǵan jaǵdaıda, qyzmetti júzege asyrýǵa tyıym salý múmkindigimen qurylys naryǵyna qatysýshylardyń ortaq jaýapkershiligin belgileý josparlanǵan», - dedi vıtse-mınıstr.