Kýrıl araldarynda Reseı Federaldyq Qaýipsizdik Qyzmetiniń qyzmetkerleri teńizge batyp ketti
ASTANA. 25 qańtar. QazAqparat - Reseıdiń Federaldyq Qaýipsizdik Qyzmetiniń Sahalın shekara basqarmasynyń on qyzmetkeri Kýrıldiń Kýnashır aralynyń mańynda sýǵa batyp ketti.
Shekarashylar teńizge jaǵalaýdan 500 metr qashyqtyqta turǵan kemege otyrý úshin rezeńke qaıyqqa minip, teńizge shyqqan, alaıda, olar otyrǵan qaıyq aýdarylyp qalǵan, dep habarlaıdy ITAR-TASS. Oqıǵa 24 qańtar kúni keshki saǵat segizder shamasynda oryn alǵan. Rezeńke qaıyqqa mingen atalmysh uıym qyzmetkerleri shekarashylar kemesine jetip almaq bolǵan. Alaıda, teńiz tolqyny qaıyqty aýdaryp jibergen. Ázirge olardyń qutqarý saýyttaryn kıgen-kımegeni belgisiz. Qaıyq aýdarylǵan kezde teńiz tolqynynyń aýqymdylyǵy bir metrden aspaǵan, daýyl da bolmaǵan. Qazirgi sátte qaza bolǵan tórt adamnyń múrdesi tabyldy, alty adam áli izdestirilip jatyr. «Teńizdegi kóptegen aǵymdar olardy alysqa aǵyzyp áketýi múmkin», - degen boljam bar.
