Quryq portyndaǵy jańǵyrtý jumystary tranzıttik áleýetti arttyrdy
ASTANA. KAZINFORM — Quryq portynda KÓK-1 jáne KÓK-2 kótergish-ótpeli kópirlerin jańǵyrtý jumystary sátti aıaqtaldy. Jańǵyrtý nátıjesinde paromdardy óńdeý ýaqyty qysqaryp, port ınfraqurylymynyń jumys tıimdiligi artty.
Jańǵyrtý aıasynda kópirlerdiń paıdalaný múmkindikteri keńeıtilip, temirjol paromdaryn óńdeý ýaqyty 18 saǵattan 12 saǵatqa deıin, al avtoparomdardy óńdeý ýaqyty 10 saǵattan 6 saǵatqa deıin qysqardy.
Al, temirjol paromdarynyń syıymdylyǵy 40 vagonnan 48 vagonǵa deıin ulǵaıtyldy. Bul júktasymaly kólemin arttyryp, porttyń ótkizý qabiletin jaqsartýǵa múmkindik berdi.
Infraqurylymdy jańǵyrtý Quryq portynyń Transkaspıı halyqaralyq kólik baǵyty (THKB) boıyndaǵy strategııalyq torap retindegi mańyzdylyǵyn nyǵaıtyp, elimizdiń tranzıttik áleýetin iske asyrýǵa jańa múmkindikter ashady.
Aıta ketý kerek, 2026 jyldyń alǵashqy alty aıynyń qorytyndysy boıynsha Quryq porty 884,8 myń tonna júk óńdedi. Bul port qyzmetterine degen turaqty suranysty jáneonyń Transkaspıı halyqaralyq kólik baǵytyn damytýdaǵy mańyzdy rólin aıqyndaıdy.
Júk aǵyny qurylymynda temirjol baǵyty boıynsha 475,5 myń tonna júk tıeldi, onyń ishinde 242,3 myń tonnasy eksporttyq, al 233,2 myń tonnasy ımporttyq júkter boldy. Avtomobıl baǵyty boıynsha 306,2 myń tonna júk óńdeldi, onyń 151,4 myń tonnasy eksport, al 154,8 myń tonnasy ımport. Sonymen qatar, porttyń astyq termınaly arqyly 104,1 myń tonna astyq daqyldary tıeldi.
Quryq porty júkterdi senimdi óńdeýdi qamtamasyz ete otyryp, logıstıkalyq úderisterdiń tıimdiligin arttyrýdy jalǵastyryp jatyr. Bul Qazaqstannyń Kaspıı óńirindegi mańyzdy kólik-logıstıkalyq torap retindegi pozıtsııasyn nyǵaıtýǵa yqpal etedi.
Aıta ketelik Quryq portynda «Ázerbaıjan-Qazaqstan teńiz kabeldik júıesi» jobasynyń jańa kezeńi bastalǵan edi.
