Quryq portynda qýaty 1 mıllıon tonnalyq astyq termınalynyń qurylysy aıaqtaldy
AQTAÝ. KAZINFORM – Mańǵystaýda Quryq portynda salynyp jatqan astyq termınalynyń qurylysy aıaqtalyp, qondyrǵylar synaqtan ótkizilip jatyr. Sondaı-aq, Soltústik Qazaqstan óńiriniń bıdaıy qabyldanyp jatyr. Jospar boıynsha alǵashqy astyq qazan aıynyń sońynda jóneltiledi.
Quryq porty – Qytaı men Ortalyq Azııadan Eýropaǵa júk tasymaldaýdyń eń qysqa joly retinde tanylǵan. Bıyldyń ózinde «Orta dáliz» baǵyty boıynsha 1 mln 600 myń tonna júk óńdelip, jóneltildi. Port basshylyǵynyń aıtýynsha, sońǵy jyldarda vagonmen tasymaldanatyn júkterge qosa, avtokólik tasymaly artqan. Nátıjesinde byltyr Quryq porty 2 mln tonnadan asa júk óńdep, buryn-sońdy bolmaǵan kórsetkishke qol jetkizdi.
«Soltústik pen Ońtústik dálizderge qaraǵanda qazirgi geosaıası jaǵdaılarǵa baılanysty «Orta dálizdiń» mańyzy artyp keledi. Jyldan-jylǵa kólik aınalymy da ósip jatyr. Osy 2024 jyly búgingi tańda 18 myń kólik óńdep, qabyldap, jiberip tastadyq», - deıdi Quryq porty bas dırektorynyń paıdalaný jónindegi orynbasary Baqytkereı Álibekov.
«Orta dáliz» Transkaspıı halyqaralyq kólik baǵytynyń bir tarmaǵy bolyp esepteledi. Ol arqyly Qytaı, Orta Azııa elderinen shyqqan júk Quryq jáne Aqtaý porttarymen Azerbaıjan, Grýzııa, Túrkııa odan ári Eýropa elderine jetkiziledi. Quryq porty osy baǵyt boıynsha 2017-jyldan beri 10 mıllıon tonnadan astam júk ótkizgen.
«Bıyl júk tasymalyn 2 mln 300 myń tonna deıin jetkizýdi josparlap otyrmyz. Búginde sonyń 1 mıllıon 600 myń tonnasy óńdelip, jóneltildi. Alda áli 2 aıdan asa ýaqyt bar. Astyq termınaly jylyna 1 mıllıon tonna bıdaı óńdeıdi. Oǵan qosa, biz úshinshi aılaqty generaldyq júkter qabyldaıtyn aılaqqa aınaldyrý úshin ınvestorlarmen kelissózder júrgizip jatyrmyz. Ol taǵy 500 myń tonna júk ótkizýge yqpal etedi», - deıdi Quryq porty bas dırektorynyń paıdalaný jónindegi orynbasary Baqytkereı Álibekov.
Buǵan deıin, Mańǵystaýda Beıneý-Tájen tas jolynda 6 sheteldik azamattyń qaza tapqany týraly jazǵan bolatynbyz.
