Quryq portynda «Ázerbaıjan-Qazaqstan teńiz kabeldik júıesi» jobasynyń jańa kezeńi bastaldy
ASTANA. KAZINFORM — Quryq portynda «Ázerbaıjan-Qazaqstan Teńiz Kabeldik Júıesi» (Azerbaijan-Kazakhstan Sea Cable System) strategııalyq jobasy sheńberinde sýasty talshyqty-optıkalyq kabel partııasyn qabyldaý boıynsha operatsııa sátti júrgizildi.
Іri jáne aýyr salmaqty júk úsh mamandandyrylǵan kólikten turatyn avtokolonnamen jetkizildi. Portta transkaspıı tsıfrlyq ınfraqurylymyn salý úshin aldaǵy ýaqytta Ázerbaıjan Respýblıkasyna jóneltiletin jabdyqtardy qabyldaý jáne óńdeý boıynsha jumystar oryndaldy.
Jobany iske asyrý halyqaralyq telekommýnıkatsııalyq dálizderdi damytýǵa, Azııa men Eýropa arasyndaǵy tsıfrlyq baılanysty nyǵaıtýǵa, sondaı-aq eýrazııalyq keńistikte derekterdi berý arnalarynyń senimdiligi men ótkizý qabiletin arttyrýǵa baǵyttalǵan.
Quryq porty Transkaspıı halyqaralyq kólik baǵdaryn damytýǵa jáne Qazaqstannyń Shyǵys pen Batys arasyndaǵy negizgi tranzıttik torap retindegi ustanymyn nyǵaıtýǵa yqpal ete otyryp, iri halyqaralyq ınfraqurylymdyq jobalardy kóliktik-logıstıkalyq qoldaýdy qamtamasyz etýde mańyzdy ról atqarýdy jalǵastyryp otyr.
Aıta ketelik Úkimet basshysy Aqtaý men Quryq porttarynyń ınfraqurylymyn jańǵyrtýdy jedeldetý qajet ekenin aıtqan.
