Quryq porty akvatorııasynyń túbin tereńdetý jumystary bastaldy

ASTANA. KAZINFORM — Mamandar port túbin bir jarym-eki metrge tereńdetedi.  Jumystarǵa iri eýropalyq Jan De Nul kompanııasynyń arnaıy tehnıkasy jumyldyryldy. Kompanııamen ERS kelisimshartqa qol qoıyldy. Bul týraly Kólik mınıstrligi habarlady.

Kompanııa jobalaýdan bastap tereńdetý jumystarynyń aıaǵyna deıin tolyǵymen jaýapty. Port túbin tereńdetý jumystary termınaldyń ótkizý qabiletin odan ári arttyrýǵa múmkindik beredi.

Quryq portynyń ótkizý qabileti 6 mln tonna (temirjol termınaly – 4 mln, avtotermınal – 2 mln). Sondaı-aq, portta 250 júk kóligin saqtaý múmkindigi qarastyrylǵan. Dál osyndaı jumystar Aqtaý portynda da júrgiziledi.

Port túbin tereńdetý Transkaspıı halyqaralyq kólik baǵytyn odan ári damytý aıasynda qabyldanǵan keshendi sharanyń biri. THKB boıynsha júkterdi tasymaldaý kólemi 7 aıda 62% - ǵa ulǵaıyp, 2,5 mln tonna (2023 jyldyń sáıkes kezeńinde bul kórsetkish 1,6 mln tonnaǵa teń boldy).