Qurǵaqshylyqtan zardap shekken elimizdiń Batys óńirlerine Soltústik aımaqtardan astyq tasymaldaý jumystary júrip jatyr
ASTANA. Qyrkúıektiń 27-si. QazAqparat /Rýslan Ǵabbasov/ - Bıylǵy jazda qurǵaqshylyqtan zardap shekken elimizdiń Batys óńirlerine Soltústik aımaqtardan astyq tasymaldaý jumystary júrip jatyr. Bul týraly búgin on-laın rejıminde ótip jatqan Úkimet otyrysynda Aýyl sharýashylyǵy mınıstri Aqylbek Kúrishbaev málim etti.
«Biz jaz aılarynda Batys Qazaqstan jáne Aqtóbe oblystaryn araladyq. Tıisti resrýstar bóldik. Atap aıtqanda, osy óńirlerde qurǵaqshylyqtan zardap shekkenderge kómek kórsetý máselesi qalaı júrip jatyr», dep suraǵan Premer-Mınıstr Kárim Másimovtiń saýalyna, A. Kúrishbaev jumaǵa qaraı Soltústik oblystardan Batys Qazaqstan jáne Aqtóbe oblystaryna tasymaldanatyn astyq kólemi 99 myń tonna bolatynyn jetkizdi.
«Sizdiń tapsyrmańyz boıynsha bul másele týrasynda tıisti sharalar atqarylyp jatyr. Sondaı-aq astyq tasymaly boıynsha tıisti úderister jalǵasýda», dedi mınıstr. Sonymen qatar A. Kúrishbaev jemshóp ázirleý turǵysynda sýbsıdııalaý boıynsha qaýly Úkimet qaraýyna engizilgenin aıtyp ótti. «Atap aıtqanda, bul máseleni qarastyryp, qarjy bólýdi suraımyn. Sebebi, qurǵaqshylyq bolǵan Batys Qazaqstan men Aqtóbe jáne Qostanaı oblystaryndaǵy aýyl sharýashylyǵy taýarlaryn óndirýshilerine qoldaý kórsetýimiz kerek», dedi mınıstr.
