Qurǵaqshylyqtan zardap shekken dıqandardyń qaryz óteý merzimin uzartý jumystary júrip jatyr

Bul týraly búgin egin oraǵy naýqany boıynsha selektorlyq tártiptegi Úkimet otyrysynda QR Aýyl sharýashylyǵy mınıstrliginiń jaýapty hatshysy Evgenıı Aman málim etti.

«QazAgro» holdınginiń enshiles uıymdarynda qýańshylyqtan zardap shekken aýyl sharýashylyǵy taýaryn óndirýshiler qaryzdarynyń merzimin uzartý jumystary júrip jatyr. Sondaı-aq, egis alqaptaryn saqtandyrý tólemderiniń ornyn toltyrý baǵytynda sharalar atqarylýda»,-dedi jaýapty hatshy.

Onyń sózine qaraǵanda, zardap shekken egis alqaptarynyń aýmaǵy 1 mln. gektardan asyp otyr. Mundaı egis alqaptarynyń 90 paıyzǵa jýyǵy 4 oblysqa tıesili. Onyń ishinde Qostanaı, Aqmola, Aqtóbe jáne Batys Qazaqstan oblystary bar.

Aıta keteıik, búginde «QazAgronyń» enshiles uıymdaryna 1,3 mlrd. teńgeniń merzimin uzartý boıynsha aýyl sharýashylyǵy qurylymdarynan 11 ótinim túsken.