Qurǵaqshylyqtan zardap shekken batys óńirine 177 vagon shóp jetkizildi

NUR-SULTAN. QazAqparat – «Qazaqstan temir joly» UK» aktsıonerlik qoǵamy 177 vagon shópti elimizdiń qurǵaqshylyqtan zardap shekken batys óńirine jetkizip berdi, dep habarlaıdy QazAqparat.

2021 jylǵy shildede jáne tamyzdyń 9 kúninde Mańǵystaý oblysyna prestelgen shóbi bar 177 vagon jetkizildi. Júk jóneltýshiler ótinimderi boıynsha tamyz aıyna tasymaldaýǵa taǵy 164 vagondy tıeý josparlanǵan.

«Pishen Atbasar, Arqalyq, Qaraǵandy, Shelek, Taraz, Shý, Saryaǵash, Arys, Oral, Shymkent jáne t.b. stantsııalardan jóneltiledi. Jetkiziletin stantsııalar – Mańǵystaý, Ózen, Shetpe, Beıneý, Sekseýil jáne basqalary. Negizinen shóp «QTJ» UK» AQ enshiles kásiporny – «Qaztemirtrans» AQ menshigindegi vagondarǵa tıeledi»,-delingen habarlamada.