Qurǵaqshylyq bolsa da, bıyl kúrishsiz qalmaımyz – mınıstrlik

ASTANA. QazAqparat – Qurǵaqshylyqtan kúrish alqaptary zııan shekken joq. Bul týraly AShM agrarlyq azyq-túlik naryǵy jáne aýyl sharýashylyǵy ónimderin qaıta óńdeý departamenti dırektorynyń mindetin atqarýshy Shaımerden Ahmetov aıtty, dep habarlaıdy QazAqparat tilshisi.

«Shynymen de, bıyl jaǵdaı kúrdeli bolyp tur. Qurǵaqshylyq boldy, biraq barlyq jerde, barlyq óńirde emes. Qyzylorda oblysynyń ákimdigi usynǵan aqparatqa sáıkes, ol jaqta qurǵaqshylyqtan kúrish alqaptary zardap shekpegen. Qanaǵattanarlyq, ótken jylǵa deńgeıde ónim alynbaq», - dedi ol Ortalyq kommýnıkatsııalar qyzmetindegi dóńgelek ústel otyrysynda.

Shaımerden Ahmetovtyń aıtýynsha, el turǵyndary shyqqan ónimniń jartysyn ǵana tutynady. Al qalǵan bóligi eksportqa shyǵarylady.

«Sondyqtan da qurǵaqshylyqtan kúrishsiz qalý degen másele týmaıdy. Onyń ústine buǵan deıin atap ótkenimdeı, birshama bóligin eksportqa shyǵarýǵa da áleýetimiz jetedi. Reseı men Úndistanǵa eksporttyń jabylýyna baılanysty ashylýy múmkin naryqtarǵa kúrish eksporttaýǵa múmkindik bar. Degenmen, onyń bári ol jaqta baǵanyń qandaı bolatynyna, óndirýshilerimizge jańa nemese buǵan deıin kúrish eksporttap kelgen dástúrli naryqtyń qaısysy tıimdi bolatynyna baılanysty», - dedi Shaımerden Ahmetov.