Qurǵaqshylyqtan zardap shekken jer kólemi 120 jylda eki ese artty – EYDU esebi

ASTANA. KAZINFORM – Qurǵaqshylyqtan zardap shekken jer kólemi cońǵy 120 jylda eki ese artty. Ekonomıkalyq yntymaqtastyq jáne damý uıymynyń (EYDU) jańa baıandamasyna sáıkes, qurǵaqshylyq zardabynyń quny da kúrt ósti, dep habarlaıdy Kazinform. 

EYDU málimetinshe, 2035 jylǵa qaraı qurǵaqshylyq búginge qaraǵanda keminde 35%-ǵa qymbatqa túsedi. 

«Jahandyq qurǵaqshylyq boljamy: úrdister, saldary jáne budan da qurǵaq álemge beıimdelý saıasaty» atty baıandamasynda atap ótilgendeı, klımattyń ózgerýi qurǵaqshylyqtyń nasharlaýyna ákelip soǵyp otyr. Sońǵy onjyldyqta ǵalamshardyń 40% jıi jáne qarqyndy qurǵaqshylyqty bastan ótkerdi. 

EYDU derekterinshe, ósip kele jatqan qurǵaqshylyq táýekelderin boljaý, aldyn alý jáne olarǵa beıimdelý boıynsha úkimetterdiń jedel jáne kelisilgen áreketi shyǵyndar men zalaldy aıtarlyqtaı azaıtady jáne ekonomıkalardyń turaqtylyǵy men qalpyna kelýin kúsheıte alady. 

Qurǵaqshylyq aýyl sharýashylyǵyna zııanyn tıgizip qana qoımaı, saýda, ónerkásip, energııa óndirisine de áser etedi.

1980 jyldan bastap ǵalamshardaǵy qurlyqtyń 37 paıyzynda topyraq ylǵaldylyǵy aıtarlyqtaı tómendedi. Qýańshylyq adamdarǵa da aıtarlyqtaı zııan keltirip otyr: tabıǵı apattar saldarynan adamdar qaza taýyp, kedeıshilik, teńsizdik jáne qonys aýdarý kúsheıip keledi. 

Baıandamaǵa sáıkes, sýdy paıdalanýdaǵy ınnovatsııalar ónerkásip pen óńdeý ónerkásibi tarapynan sý alýdy aıtarlyqtaı azaıtýy múmkin.

— Qurǵaqshylyqqa tózimdi daqyldardy ósirýdi yntalandyrý jáne úılestirilgen retteý sharalary arqyly ilgeriletýge bolady, al tıimdi sýarý júıeleri jahandyq sýdy paıdalanýdy aıtarlyqtaı qysqartýy múmkin. Jerdi turaqty paıdalaný jáne ekojúıeni basqarý qurǵaqshylyqqa tabıǵı tózimdilikti nyǵaıtýda jáne sýmen baılanysty mańyzdy ekojúıe qyzmetterin qoldaýda mańyzdy ról atqarady, — dep atti EYDU.

Buǵan deıin aldaǵy jyldary Arktıkadaǵy jylyný jahandyq ortasha kórsetkishten úsh ese artyq bolatynyn jazǵan edik.