Qurǵaq saýmal obyrdy, qant dıabetin emdeıdi dep ótirik jarnama jasaǵan óndirýshi aıyppul tóledi

Almaty oblysy prokýratýrasy ınternet jelisinde, sonyń ishinde tanymal blogerler, sportshylar jáne ártisterdiń paraqshasynda bıologııalyq belsendi qospalardyń qasıetterin asyra siltep kórsetetin jarnama taratylǵanyn anyqtady, dep habarlaıdy Kazinform. 

Mysaly, jelide NEOSAUMAL, SAUMAL sýblımattaý ádisimen qurǵatylǵan bıe súti qant dıabetin, onkologııalyq jáne basqa aýrýlardy emdeıtin biregeı ónim retinde belsendi jarnamalanyp jatyr. 

Eldiń shaǵymyn nazarǵa ala otyryp oblys prokýratýrasynyń tapsyrmasy boıynsha memlekettik kirister departamenti ónim jarnamasynyń ras-ótirigin tekserdi. 

SAUMAL taǵamǵa bıologııalyq belsendi qospa retinde jalpy nyǵaıtýshy, ımýndyq yntalandyrýshy, tynyshtandyrǵysh ónim retinde tirkelgeni anyqtaldy.

Basqasha aıtqanda, dárilik qasıeti joq jáne jarnamada kórsetilgen aýrýlardy emdeýge shamasy kelmeıdi. 

Densaýlyq kodeksiniń 56-babynyń 2-bóligine sáıkes BBQ jarnamasy anyq, arnaıy bilimsiz nemese arnaıy quraldardy qoldanbaı túsinilip-tanylýǵa, tutynýshy senimin teris paıdalaný arqyly olardy jańylystyrmaýǵa tıis.

Kodekstiń 56-babynyń 3-tarmaǵynyń 11,13-tarmaqshalary boıynsha jarnamada qan dıabetin, onkologııalyq jáne basqa aýrýlardy emdeý tásilderin, BBQ-lardy biregeı, barynsha qaýipsiz jáne tıimdi retinde usynýǵa tyıym salynǵan.

Osylaısha kompanııa azamattardyń senimin teris paıdalana qoımaı, kórineý jalǵan jarnama taratý arqyly ákimshilik quqyq buzǵan.

SAUMAL-dyń óndirýshisine 30 qarashada ÁQBtK 157-baby boıynsha ákimshilik hattama toltyrylyp, 175 AEK kóleminde (603 750 teńge) aıyppul salyndy.

Ol 5 jeltoqsanda tólendi.