Qurǵaq qymyz ben jylqy eti sheteldik veterınarııalyq talaptarǵa sáıkestendiriledi
ASTANA. KAZINFORM – Qurǵaq bıe súti men jylqy eti shet memleketterdiń veterınarııalyq talaptaryna sáıkestendiriledi. Bul týraly Májilis depýtattarynyń saýalyna Premer-mınıstr Oljas Bektenovtiń jaýabynda aıtylǵan.
- Jylqy sharýashylyǵy agroónerkásiptik keshendi damytýǵa arnalǵan memlekettik baǵdarlamalarǵa engizilgen. Sońǵy bes jyl ishinde jylqy sharýashylyǵyn damytýǵa bıýdjetten 9,4 mlrd teńgeden astam qarajat bólindi. Onyń ishinde osy jylǵa shamamen 900 mln teńge qarastyryldy. Qabyldanǵan sharalardyń nátıjesinde 2024 jyldyń qorytyndysy boıynsha jylqy sany 4,4 mln basqa jetti. Bul 1991 jylǵy kórsetkishten 2,5 ese joǵary, - dedi Oljas Bektenov.
Úkimet basshysynyń dereginshe, jylqy etin jáne bıe sútin óndirý men óńdeý baǵyttarynda oń serpin baıqalady.
Máselen, sońǵy bes jylda jylqy etiniń óndirisi 30 paıyzǵa artyp, 170,9 myń tonnany qurady. Al bıe sútiniń óndirisi 21 paıyzǵa ósip, 33,4 myń tonnaǵa jetti.
Aýyl sharýashylyǵy ónimderin óńdeýdi, onyń ishinde jylqy eti men bıe sútin qaıta óńdeýdi yntalandyrý maqsatynda Soltústik Qazaqstan oblysynyń tájirıbesi (2,5 % mólsherlememen jáne 10 jylǵa deıingi merzimge) Áleýmettik-kásipkerlik korporatsııalar arqyly qarjylandyrylatyn jobalar tizbesine engizildi. Sondaı-aq «Agrarlyq nesıe korporatsııasy» AQ arqyly óńdeýshi kásiporyndarǵa aınalym qarajatyn tolyqtyrý maqsatynda 5 paıyz mólsherlememen jeńildetilgen nesıe berý tetigi iske asyrylyp jatyr.
- Aýyl sharýashylyǵy mınıstrligi eksportqa baǵyttalǵan ónimderdi, onyń ishinde qurǵaq bıe súti men jylqy etin shet memleketterdiń veterınarııalyq talaptaryna sáıkestendirý boıynsha jumystar júrgizýde. Jylqy sharýashylyǵy sýbektilerine tehnıka men jabdyq satyp alýǵa 25 paıyzǵa deıingi mólsherde ınvestıtsııalyq sýbsıdııalar usynylady. Sondaı-aq jylqy jáne jabdyq satyp alýǵa jeńildetilgen nesıeler men lızıng múmkindigi qarastyrylǵan, - dedi Premer-mınıstr.
Buǵan deıin «Tulpar kúni» arnaıy ulttyq merekesin belgileý máselesi qosymsha pysyqtalatynyn jazǵan edik.