Qurǵaǵan aýmaqtarda qorǵanysh orman jolaqtaryn qurý baǵdarlamasy ázirlenedi
ASTANA. KAZINFORM - Kaspıı teńiziniń sý resýrstaryn saqtaý jónindegi memleketaralyq baǵdarlama ázirleý máselesi pysyqtalyp jatyr. Bul týraly jyl qorytyndysyna oraı BAQ ókilderine arnalǵan brıfıngide Ekologııa jáne tabıǵı resýrstar mınıstri Erlan Nysanbaev aıtty.
- Orman saıasatynyń basym baǵyttarynyń biri – Aral men Kaspııdiń shóleıttenýine qarsy kúres júrgizý. 2021–2025 jyldar aralyǵynda Aral teńiziniń qurǵaǵan tabanynda 920 myń gektardan astam aýmaqta orman-melıoratsııalyq jumystary júrgizildi. Bul jumystar aldaǵy jyly da jalǵasyn tabatyn bolady. Qazalyda jylyna 3 mln kóshet óndirýge arnalǵan pıtomnık salyndy. Aral teńiziniń qurǵaǵan tabanynda qosymsha jańa pıtomnık salynyp jatyr. Qyzylorda oblysynda Qazaq orman sharýashylyǵy ǵylymı-zertteý ınstıtýtynyń fılıaly qurylyp, jalpy aýmaǵy 1,3 mln gektardan asatyn «Aral ormany» tabıǵı rezervatyn qurý boıynsha tıisti sharalar qabyldanyp jatyr, - dedi mınıstr.
Ol Kaspıı teńiziniń ekologııalyq problemalaryn zertteý úshin Prezıdenttiń bastamasymen Qazaq Kaspıı teńizi ǵylymı-zertteý ınstıtýty qurylǵanyn aıtty.
- Búgingi tańda mınıstrlik Kaspıı mańy elderimen Kaspıı teńiziniń sý resýrstaryn saqtaý jónindegi memleketaralyq baǵdarlamany ázirleý týraly máselesin pysyqtap jatyr. Sonymen birge, Aral tájirıbe negizinde qurǵaǵan aýmaqtarda qorǵanysh orman jolaqtaryn qurý baǵdarlamasy ázirlenip jatyr, - dedi Erlan Nysanbaev.
Aıta keteıik, kelesi jyly elimizge birneshe kertaǵy men jolbarys jetkizilmek.