Kúrejoldardaǵy medıtsınalyq qutqarý beketteri ózderiniń tıimdiligin kórsetti - QR ІІM TJK
ASTANA. QazAqparat - Kúrejoldardaǵy medıtsınalyq qutqarý beketteri 4175 adamǵa kómek kórsetti. Bul týraly búgin QR Іshki ister mınıstrliginiń Tótenshe jaǵdaılar komıteti Halyqty aqparattandyrý jáne oqytý bóliminiń bastyǵy Rýslan Imanqulov málim etti.
«Búgingi kúni avtojoldardyń asa qaýipti ýchaskelerinde 40 medıtsınalyq qutqarý beketi jumys isteıdi. Olar medıtsınalyq jabdyqtarmen, sý saqtaýǵa arnalǵan ydyspen jáne janarmaımen jabdyqtalǵan. Bul beketter qazirgi ýaqytta ózderiniń tıimdiligin kórsetip otyr», - dedi R.Imanqulov.
Onyń atap ótýinshe, ótken jyly atalǵan beketter 1188 márte jolǵa shyǵyp, olardyń qyzmetkerleri 4175 adamǵa medıtsınalyq kómek kórsetken. 1003 adam emdeý mekemelerine jatqyzylǵan.
«Jol-kólik oqıǵasy oryn alǵan jerge brıgadalardyń jetýiniń ortasha ýaqyty 25 mınýtty quraıdy. Bul zardap shekken adamǵa alǵashqy medıtsınalyq kómekti barynsha tıimdi kórsetýge jetkilikti. Al osy jylǵy qys mezgiliniń basynan beri búginge deıin kúrejoldardaǵy medıtsınalyq qutqarý beketteri 286 ret jolǵa shyǵyp, 1319 adamǵa kómek kórsetti», - dedi ol.
