Kúresten jastar arasyndaǵy álem chempıonatynda Qazaqstan qorjynyna taǵy bir kúmis medal tústi
ASTANA. QazAqparat - Frantsııanyń Makon qalasynda kúres túrleri boıynsha ótip jatqan jastar arasyndaǵy álem chempıonatynyń úshinshi kúni Qazaqstan qorjynyna taǵy bir kúmis medal tústi.
QR Mádenıet jáne sport mınıstrligi Sport jáne dene shynyqtyrý isteri komıtetiniń baspasóz hatshysy Baqytbek Hamıttiń habarlaǵanyndaı, qyzdar kúresi boıynsha Svetlana Ankıcheva 44 keli salmaqta kúmis júldeger atandy. Qazaqstandyq palýan alǵashqy beldesýinde taıpeılik qarsylasyn 10:0 esebimen taza jeńse, sosyn úndistandyqty 8:3 esebimen qapy qaldyrdy. Sodan keıin reseılikti 4:2 esebimen utqanymen, fınalda ǵana qarsylasyna ese jiberdi.
Eske sala keteıik, buǵan deıin grek-rım kúresinen batysqazaqstandyq palýan Qaharman Qısmetov 66 keli salmaqta sońǵy beldesýge deıin jetip, kúmis júldeni ıelengen bolatyn. Al onyń aldynda taǵy bir qazaqstandyq Temirlan Shadýkaev grek-rım kúresinen 74 keli salmaqta jastar arasyndaǵy álem birinshiliginiń altyn medalin jeńip alǵan edi. 
