Kúresten QR Kýbogynyń júlde qory - 30 myń dollar
ASTANA. QazAqparat - Astanada erkin, grek-rım jáne áıelder kúresinen ótip jatqpn QR Kýbogynyń júlde qory 30 myń dollardy qurady. Bul týraly búgin «Dáýlet» sport kesheninde ótken baspasóz máslıhatynda málim boldy.
«Bul Kýboktyń burynǵylardan ereksheligi - kúrestiń úsh túri boıynsha jarystyń bir jerde ótkizilýi. Ekinshiden, bul arqyly biz ár kúrestiń ár óńirde qanshalyqty dárejede damyǵanyn bile alamyz. Úshinshiden, sporttyq jekpe-jek konfederatsııasy men kúres federatsııasy birlese otyryp, 30 myń dollar kóleminde júlde qoryn taǵaıyndady. Mundaı qomaqty qarjy birinshi ret tigilip otyr», - dep atap ótti Respýblıkalyq kúres federatsııasynyń vıtse-prezıdenti Erlan Qojasbaı.
Onyń aıtýynsha, jarysqa qatysatyn 16 qurama 4 kvartetke bólingen. Osy tórttiktiń jeńimpazdary ózara myqtyny anyqtaıdy.
Búgin boz kilemde grek-rım kúresiniń balýandary beldesip jatyr. Al 31 qazan men 1 qarashada erkin kúres sheberleri kúsh synasady. 2 qarasha kúni sportsúıer qaýym áıelder arasyndaǵy kúresti kóre alady. Jarys «Dáýlet» sport kesheninde ótip jatyr.
