Kúresten Qazaqstan chempıony: Ózime jeńis syılaıtyn eki ádisim bar
- Sizdiń esimińizdi alǵash ret Olımpıadanyń qola júldegeri Nurıslam Sanaevtyń jattyqtyrýshysy Baýyrjan Nurmahanovtan estidim. Bapker bolashaǵynan mol úmit kúttiretin palýan dep aıtty. Jalpy sportqa qalaı keldińiz?
- Týǵan jerim Temir aýdany. Al kúres úıirmesine alǵash ret 2009 jyly bardym. Ol kezde Muǵaljar aýdany, Embi qalasyndaǵy №4 balalar jáne jasóspirimder sport mektebine baryp, jattyǵýdy bastadym. Týǵan aǵama erip úıirmegen qatysqan edim. Ol fýtbolda jaqsy kórdi. Shyny kerek, bala kezde jan qınamaı, sporttyń da jeńilin tańdaımyn dep oılaýshy edim. Alǵashqy jattyqtyrýshym – Ǵızat Túsipbaı. Janynan qaldyrmaı ertip júrdi, maǵan úmit artty. Keıin sportqa qyzyǵýshylyǵym oıandy.
- Alǵashqy jeńisińiz esińizde me?
- Bári esimde. Ol kezde Embi qalasynda týrnır boldy. 42 keli salmaqta boz kilemge shyqtym. Alǵashqy saıys bolǵan soń jattyqtyrýshym «jarysqa qatysyp kór, saıysty sezin, oryn alý mindetti emes» dep aıtqanymen, men tek jeńiske jetý maqsatynda kúrestim. Jeńiske jettim. Ózime úshin yńǵaıly, sátti shyǵatyn, jeńis syılaıtyn eki ádisim bar. Boz kilemde reti kelse, bastaǵan isti sońyna deıin jetkizýge kúsh salamy. Ol kezde arnaıy sporttyq kıimimiz bolmady. Shulyqpen bozkilemde júrgen edik. Sol medalim áli de úıde.
- Sodan soń...
- Keıin 8 synypta, ıaǵnı, 2012 jyly Eset batyr atyndaǵy mektep-ınternatqa túsip, Medet Atabaevtyń qolastynda jattyqtym. Al 2016 jyly Almaty oblysyndaǵy respýblıkalyq sport kolledjine oqýǵa tústim. Úsh jyl tálim alyp, 2019 jyly oblysqa qaıta oraldym. Qazir Jekpe-jek sport kesheninde jattyǵý jasap júrmin. Jattyqtyrýshylarym – Shoqan jáne Darhan Dilmaǵambetovtar. Endi Álem chempıonaty aldynda ótetin irikteýge qatysamyn. Meniń qarsylasym petropavoldyq Dáýret Temirjanov.
- Qatelespesem 57 keli salmaqta kúresesiz... Qaı ýaqyttan beri osy salmaqta jarystarǵa qatysap júrsiz?
- Men osy salmaqta 2016 jyldan bastap kúresip júrmin. Aldymen jastar arasynda, 2019 jyldan bastap eresekter arasyndaǵy jarystarǵa qatystym.
- Jetistikterińiz?
- 2018 jyly sport sheberi atandym. Al 2019 jyly eresekter arasyndaǵy spartakıadaǵa qatystym. Jarys Shymkent qalasynda ótti. Onda birinshi oryn aldym. 2020 jyly Óskemen qalasynda Qazaqstan chempıonatyna qatysyp, birinshi oryndy ıelendim. 2021jyly da el birinshiligine qatysyp, 57 keli salmaqta chempıon atandym.
- Álem chempıonatyna irikteý dep aıttyńyz... Daıyndyq qalaı?
- Aptasyna alty kún jattyǵý bolady. Jeksenbi demalys. Kún saıyn saǵat 11:00-de stadıonǵa kelemin. Dúısenbide ýaqytqa júgiremiz. Alǵashqy 10 sekýnd tez, 20 sekýnd baıaý ádisimen 10 mınýt boıy júgiremiz. Kelesi kúni on aınalymdy toqtamaı júgiremiz. Sársenbide 15 aınalymdy baǵyndyramyn. Senbide júgirdim, aıaqqa kúsh tústi. Keıin 100 ret týrnıkke tartyldym, 200 ret keýdeni jerden kóterdim.
- Jattyqtyrýshy kún saıyn janyńyzdy bola ma?
- Iá, mindetti túrde baqylaıdy. Senedi, degenmen pendemiz, jalqaýlyq basyp ketýi múmkin. Júgirgende de aıaq alysymyzǵa qarap otyrady.
- Bar ýaqytyńyzdy sportqa arnadyńyz ba?
- Iá, jumys istemeımin, tek jarystarǵa daıyndalyp, sheberligimdi shyńdap júrmin.
- Tabysyńyz bar ma?
- Stıpendııa alamyn, eki aı buryn ǵana baspana berdi. Oǵan deıin týma-týystyń úıinde, jattyqtyrýshy qamqorlyǵynda boldym.
- Sportshynyń tamaqtanýy qadaǵalana ma?
- Bizdiń as mázirimizde esh aıyrmashylyq joq. Tek tańerteń tańǵy asymdy ózim daıyndaımyn. Ózge ýaqytta dámhanaǵa baramyn.
- Taqyrypty qaıtadan sportqa qaraı bursam... Shyny kerek, biz Olımpıadada boksty, ózge ýaqytta fýtboldy kóp qaraımyz. Tokıo Olımpıadasynda ǵana tennıs, karatege de nazar aýdara bastaǵandaımyz. Kórermen retinde aıtyp otyrmyn. Al ózge salany tańdaǵan sportshylar ne sezinedi?
- Shoý bar jerde kórermen de kóp. Shynyna kelgende eń qıyny kúres ári qazaqtyń, naǵyz batyrlardyń sporty dep aıtar edim. Fýtboldy kópshilik kóredi, emotsııa kóp. Erejesiz jekpe-jek de sońǵy ýaqytta sánge aınaldy. Al kúres 1938 jyldan bastap spartakıada baǵdarlamasyna endi. Sodan beri qalmaı, damyp keledi.
- Alǵa qoıǵan maqsat, armanyńyz?
- Sportshy úshin el týyn kóterip, ánuranyn qosyla shyrqaý eń úlken baqyt. Álem chempıonatynda, Olımpıadada top jaryp, kók baıraǵymyzdy bıikke kóterip, jeńis turǵynynan kórinsem dep armandaımyn. Osy jolda aıanbaı ter kógý, maqsatty jattyǵý, armanǵa qol jetkizý... Meniń aldymdaǵy bar jospar osy.
- Jeńis tileımin!
