Kúresten Qazaqstan chempıonatynda alǵashqy júldegerler anyqtaldy
ASTANA. 14 naýryz. QazAqparat - Shymkentte kúresten Qazaqstannyń chempıonaty bastaldy, dep habarlady Vesti.kz.
Jarystyń birinshi kúni 55, 66, 84 jáne 120 kılogramm salmaq sanattary arasynda grek-rım kúresi boıynsha kezdesýler ótkeni týraly Qazaqstannyń Kúres federatsııasynyń resmı saıtynda habarlandy.
Eń jeńil salmaq fınalynda jasóspirimder arasyndaǵy álem chempıonatynyń kúmis júldegeri Jambyl oblysynan Janserik Sarsenbıev jáne Almaty oblysynan Bekjan Myrzalıev kezdesti. Eki kezeńde Sarsenbıev kúshtirek bolyp shyqty. «El chempıonatynyń aldynda birneshe halyqaralyq jarystarǵa qatysýym maǵan qosymsha tájirıbe berdi jáne sol sebepti men osy jerde básekelesterimdi uttym dep oılaımyn», - dep atap ótti J.Sarsenbıev.
66 kılogramm salmaq sanatynda 35 adam, onyń ishinde Azııa chempıonatynyń júldegeri Eldar Qaıratov qatysty. Alaıda ol fınalǵa óte alǵan joq. Sheshýshi aıqasta kilem ıesi Ashat Jańbyrov Aqtóbe ókili Nurdaýlet Elmuratovtan ústem boldy.
84 kılogramm salmaqtaǵy basty tańǵalarlyq oqıǵa faktisi el kóshbasshylarynyń biri - Alhazýr Ozdıevtiń fınalǵa shyǵý jekpe-jeginde Nursultan Tursynovtan jeńilis tapqany boldy. Sheshýshi kezdesýde Tursynov Andreı Samohınnen jeńildi. «Men kúreste jańa ómir bastap kelem, jáne ony men chempıondyqtan bastaýym kerek boldy dep esepteımin. Danııal Gadjıevtiń bolmaǵany ókinishti, biraq men halyqaralyq týrnırlerde áli-aq eń myqtyny anyqtaı alamyz dep oılaımyn»,- degen A.Samohın jeńisten keıin oıymen bólisti.
Eń aýyr 120 kılogramm salmaq sanatynda altyn medaldi taıaýda ǵana jasóspirimder razrıadynan eresekterge ótken Erkin Sháıkenov qanjyǵasyna baılady.
