Kúresten Býdapeshttegi reıtıngtik týrnırde Qazaqstan qorjynyna qos medal tústi
ASTANA. KAZINFORM – Majarstan astanasy Býdapeshtte kúresten ótip jatqan reıtıngtik týrnırde Qazaqstan quramasy taǵy eki medal oljalady.
Jarystyń ekinshi kúni erkin kúres sheberi Edige Qasymbek 125 kelige deıingi salmaqta chempıon atandy.
Edige aldymen 1/8 fınalda rýmynııalyq Omar Saremdi 6:2 esebimen tize búktirdi. Sodan keıin shırek fınalda asa tartysty básekede bahreındik Shamıl Sharıpovtan 4:3 esebimen basym tústi. Al jartylaı fınalda qytaılyq Býherdýnǵa esh múmkindik qaldyrǵan joq – 10:0.
E.Qasymbek fınalda Polsha ókili Kamıl Kotsıolekti 5:0 esebimen senimdi túrde jeńdi.
Áıelder arasynda Zeınep Baıanova 50 kelige deıingi salmaqta úzdik úshtikke ilikti.
Batys Qazaqstan oblysynyń ókili áýeli ońtústikkoreıalyq Mıran Chondy aıqyn basymdylyqpen utty – 11:1. Shırek fınalda reseılik Nadejda Sokolovadan 0:5 esebimen jeńilip jatyp, tarazy basyn ózine aýdara bildi – 16:11. Z.Baıanova jartylaı fınalda amerıkalyq Sara Chaveske jol berdi – 0:4.
Zeınep qola júlde úshin ýkraınalyq Oksana Lıvachpen beldesýi kerek bolatyn. Alaıda qarsylasy jaraqatyna baılanysty boz kilemge shyqpaǵandyqtan, jeńis qazaqstandyq balýanǵa berildi.
Eske sala keteıik, budan buryn qazaqstandyq balýandardyń reıtıngtik týrnırde alty medal jeńip alǵanyn jazǵan edik.
