Kúresten álem chempıonatynyń qorytyndysy: Qazaqstan 7 medal, 8 joldama aldy
Naqtyraq aıtsaq, 14-22 qyrkúıek aralyǵynda Qazaqstan astanasynda grek-rım, erkin jáne áıelder kúresinen Tokıo Olımpıadasyna joldama beretin álem chempıonaty ótti. Baıraqty básekede álemniń 100 elinen 1 002 balýan kúsh synady. Ár kúres túrinen 10 salmaqtan jalpy 30 medal jıyntyǵy sarapqa salyndy. Sondaı-aq, kelesi jyly alaýy tutanatyn Tokıo Olımpıadasyna ár salmaqtan 6 balýanǵa joldama úlestirildi.
Jalpy, kúres túrlerinen qazaqstandyq balýandar 7 medal (grek-rım kúresinen - 1 kúmis, 2 qola, áıelder kúresinen - 1 qola, erkin kúresten - 2 kúmis, 1 qola) jeńip alsa, Olımpıada oıyndaryna jalpy 8 joldamaǵa ıelik etti.
Álem birinshiligin alǵash bolyp grek-rım kúresiniń sheberleri bastaǵan bolatyn. Qazaqstandyq grek-rım kúresiniń balýandary álemdik dodany bir kúmis jáne eki qola medalmen aıaqtady.
Atap aıtar bolsaq, Qorlan Jaqansha (55 keli) men Almat Kebispaevtyń (63 keli) jeńisti jolyn Meırambek Aınaǵulov jalǵastyrdy. 60 kelide beldesken Aınaǵulov kishi fınalda ýkraınalyq Lenýr Temırovti 10:0 esebimen jeńip, óziniń júlde qorjynyn álem birinshiliginiń qola júldesimen tolyqtyrdy.
Sonymen Baqtııar Baıseıitov baptaıtyn grek-rım kúresinen Qazaqstan komandasy óz elimizdegi dodany altynsyz aıaqtady. Chempıonat bastalǵanǵa deıin kúres mamandary men balýandar elimizde ótetin álemdik synda ánuranymyzdy shyrqatamyz degen oılary iske aspaı qaldy. Osylaısha, «klassıkter» álem chempıonatynan bir kúmis, eki qola jáne Olımpıadanyń eki joldamasymen qorytyndylady.
«Klassıkterden» keıin áıelder kúresine de kezek keldi. Alaıda, balýan qyzdarymyz álem birinshiligin jalǵyz qola medalmen aıaqtady. 50 keli salmaqta el namysyn qorǵaǵan Valentına Islamova álem chempıonatynda el qorjynyna jalǵyz qola medal saldy. Sondaı-aq, Tokıo Olımpıadasyna joldama jeńip aldy. Qyzdar kúresinen jalpy Olımpıadaǵa eki joldama buıyrdy. Ekinshi joldamany birinshilikte 5-orynǵa ıe bolaǵan 76 keli salmaqtaǵy balýanymyz Elmıra Syzdyqova da jeńip aldy.
Jalpy, Nur-Sultanda ótken álem birinshiliginde áıelder kúresinen alǵashqy úshtikti Japonııa, Reseı, AQSh quramalary túıindedi.
Al álem birinshiginde sońǵy bolyp, erkin kúres sheberleri beldesti. Álem chempıonatynyń qorytyndysy boıynsha erkin kúresten Qazaqstan quramasy komandalyq esepte tuńǵysh ret júldeli ekinshi orynmen aıaqtady. Reseı quramasy Nur-Sultandaǵy álem birinshiliginde 190 upaımen jalpy esepte kósh bastasa, 103 upaımen Qazaqstan quramasy ekinshi orynnan kórindi. Úzdik úshtikke 94 upaı enshilegen AQSh balýandary ıe boldy.
Ál erkin kúres balýandary álem chempıonatanda eki kúmis, bir qola medal jeńip aldy. Sondaı-aq, 57, 65, 74, 97 keli salmaqta Olımpıada oıyndaryna tórt joldamaǵa ıelik etti.
Atap aıtar bolsaq, Nurıslam Sanaev (57 keli – qola), qyzylordalyq Dáýlet Nııazbekov (65 keli – kúmis) jáne petropavldyq Nurqoja Qaıpanov (70 keli – kúmis) medalǵa ıelik etti. Bul tizimge Álisher Erǵalı (97 keli), Ǵalymjan Óserbaev (79 keli), Ádilet Daýlymbaev (86 keli) qosylar edi. Biraq úsheýi de qola júlde úshin tartysta utyldy.
Sonymen, kúres túrlerinen óz elimizde ótken álem birinshiligi taǵy da «altynsyz» aıaqtaldy. Biraq Qazaqstan balýandary Tokıo Olımpıadasyna kúrestiń úsh túrinen jalpy 8 joldamaǵa ıelik etti. Grek-rım kúresiniń balýandary - 2, áıelder kúresiniń balýandary - 2 joldamaǵa ıe bolsa, eń kóp joldamaǵa erkin kúres sheberleri qol jetkizdi. Olardyń enshisinde Olımpıada oıyndarynyń 4 joldamasy bar.
Olımpıadalyq kúres túrlerinen ótken álem chempıonatynyń jalpy esebi:
Grek-rım kúresi:
1. Reseı
2. Ózbekstan
3. Grýzııa
Qazaqstan 5-orynda
Erkin kúres boıynsha:
1. Reseı
2. Qazaqstan
3. AQSh
Áıelder kúresi:
1. Japonııa
2. Reseı
3. AQSh
Qazaqstan 6-orynda.
