Kúresten álem chempıonaty: Qazaqstandyq eki palýan «qolaǵa» talasady
Serbııa astanasy Belgradta ótip jatqan kúresten álem chempıonatynda qos qazaq palýany qola júldege talasýǵa múmkindik aldy. QazAqparat bul týraly Týrızm jáne sport mınıstrligi Sportty damytý dırektsııasynyń baspasóz qyzmetine silteme jasap habarlaıdy.
Jubanysh beldesýde Marlan Muqashev (55 kg) Taıga Onıshıdy (Japonııa) senimdi utty – 9:0. Al Demeý Jadyraev (77 kg) moldovalyq palýan Aleksandrın Gýtýdan 7:2 esebimen basym tústi.
Endi M.Muqashev keshki sessııada osy salmaqtaǵy bıylǵy álem chempıony, ırandyq Pýıa Dadmarzben, D.Jadyraev álem chempıony jáne qola júldegeri Malhas Aoıanmen (Armenııa) kúsh synasady.
Aıta keteıik, 55 kg salmaq Olımpıada baǵdarlamasyna kirmeıdi, al 77 kg kiredi. Sáıkesinshe, Jadyraev/Amoıan jáne Vardanıan/Kýsaka aıqasynda joly bolmaǵan palýandar ózara kúresip, osy salmaqtaǵy besinshi Olımpıada joldamasyna talasady.
Búgin bozkilemge shyqqan Azııa chempıony Ibragım Magomadov (72 kg) shırek fınalda Frantsııa atynan synǵa túsetin Ibragım Ganemge, Oljas Sultan (60 kg, Olımpıada salmaǵy) Ońtústik Koreıa sportshysyna, Oljas Syrlybaı (97 kg, Olımpıada salmaǵy) Italııa namysyn qorǵaıtyn Nıkoloz Kahelashvılıge jol berdi.
Keshe ulttyq qurama palýany Marlan Muqashev 1/8 aınalymda (55 kg) ýkraınalyq sportshyny utqan bolatyn. Alaıda shırek fınalda 2 dúrkin álem chempıony Eldanız Azızlıden (Ázerbaıjan) jeńilip qaldy.
Demeý Jadyraev irikteýde horvatııalyq sportshy Antonıo Kamenıashevıchti, keıin Toıly Orazovty (Túrkmenstan) jáne byltyrǵy chempıonattyń fınalısi Zoltan Levaıdy (Majarstan) jeńdi. Biraq shırek fınalda Osloda ótken 2019 jylǵy álem chepıonatynyń kúmis júldegeri, Eýropa jeńimpazy Sanan Sýleımanovqa (Ázirbaıjan) ese jiberdi.
