Kúresten ÁCh: Jámıla Baqbergenova kúmis júldeger atandy
NUR-SULTAN. QazAqparat – Qazaqstandyq balýan Jámıla Baqbergenova Norvegııa astanasy Osloda ótip jatqan álem chempıonatynda kúmis júldeger atandy, dep habarlaıdy QazAqparat tilshisi.
Qazaq qyzdary arasynda tuńǵysh ret áıelder kúresinen álem chempıonatynyń fınalyna shyqqan J.Baqbergenova 72 kelige deıingi salmaqta sońǵy básekede japonııalyq Masako Fýrýıchımen beldesti.
Buǵan deıin qarsylastar ózara úsh ret kezdesip, sonyń ekeýinde japonııalyq balýan jeńgen eken.
Bul joly tartysty básekede 2019 jylǵy álem chempıonatynyń qola júldegeri M.Fýrýıchı 3:0 esebimen aldyrmaı ketti.
Osylaısha J.Baqbergenova (jeke bapkeri Qaırat Saǵadıev) kúres túrlerinen Osloda ótip jatqan álem birinshiliginde Qazaqstan quramasy qorjynyna alǵashqy júldeni saldy.
Eske sala keteıik, budan buryn qazaqstandyq balýan Jámıla Baqbergenovanyń álem chempıonatynyń fınalyna shyqqanyn, Italııada qazaqstandyq dzıýdoshynyń jastar arasynda álem chempıonatynyń qola júldegeri atanǵanyn jazǵan bolatynbyz.
Sondaı-aq qazaqstandyq qos balýan qola júlde úshin beldesýge múmkindik aldy.
Ókinishke qaraı, Nılýfar Raımova men Dıana Kaıýmova jubanysh beldesýlerinde utylyp qaldy.
