Kúresten ÁCh: Omar Nádirov qola júlda alý úshin Eýropa chempıonatynyń júldegerlerin jeńýi kerek

ASTANA. KAZINFORM – Tırana qalasynda ótip jatqan álem chempıonatynda erkin kúres palýandary bozkilemge shyqty.

Sportty damytý dırektsııasynyń málimetinshe, irikteý nátıjesinde erteń jubanysh beldesýinde Ulttyq qurama sapynan Omar Nádirov baq synaıdy. Asa aýyr salmaqtaǵy (125 kg) otandasymyz Eýropa chempıonatynyń (U23) kúmis júldegeri ýkraınalyq Volodımır Kochanovpen kúresedi.

Jeńiske jetse, jastar arasyndaǵy Eýropa chempıonatynyń kúmis júldegeri Aıdyn Ahmadovqa (Ázirbaıjan) qarsylas bolady.

Sondaı-aq erteń erkin kúresten 57, 65, 70, 79 jáne 97 kg deıingi salmaqtaǵy irikteý ótedi. Beldesýler Astana ýaqytymen saǵat 13:30-da bastalady.

Buǵan deıin Qazaqstan balýandary áıelder kúresinen álem chempıonatyn júldesiz aıaqtaǵanyn jazǵan bolatynbyz.