Kúresten ÁCh: Kúmis enshilegen Jámıla Baqbergenova olımpıadalyq salmaqqa aýyspaq
NUR-SULTAN. QazAqparat - Norvegııanyń Oslo qalasynda ótip jatqan álem chempıonatynda áıelder kúresinen kúmis júldeger atanǵan Jámıla Baqbergenova elge oraldy. Jankúıerler álemdik synnyń júldegerin qurmetpen kútip aldy dep habarlaıdy QazAqparat Olympic.kz-ke silteme jasap.
Jámıla 72 keli salmaqta beldesip, kúmis medal ıegeri atanǵan bolatyn.
«Jankúıerlerdiń qoldaýyn shyn sezindim. Maǵan demeý bergen jandarǵa kóp rahmet! Álem chempıonaty men úshin kúmispen aıaqtaldy. Árıne, altyn alsam degen maqsatym boldy. Biraq buıyrǵany kúmis eken.
Japondyq Masako Fýrýıtımen osymen tórtinshi ret kezdesip, úsheýinde utyldym. Ony Ivan ıArygın týrnırinde bir ret jeńgen ekenmin. Endigi maqsat - olımpıadalyq salmaqqa aýysý. Sodan soń Azııa oıyndary men ózge de iri jarystarǵa daıyndalamyz», - dedi Jámıla.
