Kúresten ÁCh: Dáýlet Nııazbekov kúmis medal ıegeri atandy
NUR-SULTAN. QazAqparat – Elorda tórinde kúres túrlerinen ótip jatqan lıtsenzııalyq álem chempıonatynda erkin kúresten qazaqstandyq balýan Dáýlet Nııazbekov kúmis júldeger atandy, dep habarlaıdy QazAqparat tilshisi.
65 kelige deıingi salmaqta el namysyn qorǵaǵan Nııazbekov búgin fınalda Reseı balýany Gadjymýrat Rashıdovtan jeńilip qaldy. Rashıdov jerlesimizdi 11:0 esebimen utyp, taza jeńiske qol jetkizdi. Osylaısha, búginde 20 jyl kútken sap «altyn» qazaq balýandaryna ustatpaı ketti. Alaıda, Dáýlet jeńis tuǵyrynyń eń bıik satysynan kórine almasa da, qorjynynda Tokıo 2020 Olımpıadasynyń joldamasy men kúmis júldesi bar.
Endi erteń taǵy bir balýanymyzdyń jolyna úmitpen qaraımyz. Búgin erkin kúresten 70 keli salmaq dárejesinde otandasymyz Nurǵoja Qaıpanov fınalǵa shyqqan bolatyn.
Foto: olympic.kz
