Kúres túrlerinen QR chempıonaty: Búgin bes salmaqtyń myqtylary anyqtalady

ASTANA. KAZINFORM – Búgin Astana tórinde eresekter arasynda grek-rım, erkin jáne áıelder kúresinen Qazaqstan birinshiligi bastalady.

1-5-aqpan aralyǵynda kil myqtylar anyqtalatyn dodanyń alǵashqy kúni bes salmaqta chempıondar belgili bolady.

Atap aıtsaq, búgin, grek-rım kúresinen 55, 63, 72, 82 jáne 97 keli salmaqtaǵy balýandardyń beldesýlerine kýá bolamyz.

El birinshiligi dańqty balýan Jaqsylyq Úshkempirov atyndaǵy «Jekpe-jek» sport saraıynda ótedi. 

Al erteń, ıaǵnı 2-aqpanda grek-rım kúresinen 60, 67, 77, 87 jáne 130 keli salmaqtyń kil myqtylary anyqtalady. Al áıelder kúresinen chempıondar 3 aqpanda anyqtalsa, erkin kúres sheberleri 4-5- aqpan kúnderi boz kilemge shyǵady.

Jarystyń saltanatty ashylý rásimi búgin elorda ýaqytymen saǵat 17.30-da ótedi. Beldesýler kún saıyn saǵat 10.30-da bastalady. Ulttyq birinshilikte elimizdiń 17 oblysy men Almaty, Astana, Shymkent qalalarynan kelgen balýandar ózara myqtyny anyqtaıdy.

Al osy birinshilikte top jarǵan balýandar Bishkekte (Qyrǵyzstan) ótetin Azııa aımaqtyq, Ystanbulda (Túrkııa) ótetin álemdik irikteý týrnırinde baq synaý múmkindigine ıe bolady.