Kúres túrlerinen ÁCh: Tórt salmaqta beldesken qyzdarymyz jarystan shyǵyp qaldy
NUR-SULTAN. QazAqparat – Búgin elorda tórinde kúres túrlerinen ótip jatqan álem chempıonatynda el namysyn qorǵaǵan tórt balýan qyzymyz da qarsylastarynan utylyp qaldy, dep habarlaıdy QazAqparat tilshisi.
Búgin áıelder kúresinen 57, 59, 65 jáne 76 keli salmaq dárejelerindegi irikteý aınalymy ótken bolatyn. 57 keli salmaqta Emma Tısına, 59 keli salmaqta Mádına Baqbergenova, 65 keli salmaqta Aına Temirtasova jáne 76 kelide Elmıra Syzdyqova synǵa túsken edi. Ókinishke qaraı, tórteýi de alysqa bara alǵan joq.
Emma Tıssına kúres túrlerinen álem chempıonatynyń 1/16 fınalynda Majarstannyń ókili Emısa Barkpen kezdesip, 0:9 esebimen utylyp qalsa, Mádına Baqbergenova 1/8 aınalymda qytaılyq Ksıng Peıden 0:10 esebimen jeńildi. Al Aına Temirtasova 1/8 aınalymda reseılik Inna Trajýkovadan 2:13 esebimen jol berdi. Sondaı-aq, medaldan basty úmitker balýandarymyzdyń biri Elmıra Syzdyqova 1/8 fınalynda amerıkalyq Adelın Marııa Greeıge 0:10 esebimen ese jiberdi.
Endi, búgingi keshki sessııada 50, 53, 55 jáne 72 keli salmaq dárejesinde chempıondar men júldegerlerdiń esimderi belgili bolady. Onyń ishinde 55 kelide el namysyn qorǵaǵan Marına Sedneva, 72 kelide synǵa túsken Jámıla Baqbergenova jáne 50 keli salmaqta beldesken taǵy bir balýanymyz Valentına Islamova qola medal úshin beldesedi.
