Kúres túrleri federatsııasy jańa erejelerin talqylady
ASTANA. QazAqparat - Qazaqstan Respýblıkasy grek-rım, erkin jáne áıelder kúresi federatsııasynda jıyn ótti. Atalǵan kezdesýge Olımpıada oıyndarynyń chempıondary Jaqsylyq Úshkempirov, ıÝrıı Melnıchenko, Nurbaqyt Teńizbaev, erkin jáne áıelder kúresi federatsııasynyń vıtse prezıdenti Baýyrjan Ospanov pen kúres túrleri boıynsha bilikti bapkerler men sport mamandary qatysty, dep habarlaıdy QazAqparat.
Olar Qazaqstan Respýblıkasynyń keıbir zańnamalyq aktilerine dene shynyqtyrý jáne sport máseleleri boıynsha engizilgeli otyrǵan ózgerister men tolyqtyrýlardy talqylady. Zań jobasyn ázirleý Memleket basshysynyń «Qazaqstan - 2050» strategııasy: Qalyptasqan memlekettiń jańa saıası baǵyty» Joldaýy sheńberinde Qazaqstan Respýblıkasy Úkimetiniń aldyna qoıylǵan dene shynyqtyrýdy, buqaralyq sportty damytý jáne dene shynyqtyrý-saýyqtyrý obektilerin salý boıynsha tapsyrmalardy oryndaý qajettiligine negizdeldi.
Jınalys barysynda bilikti bapkerler men sport mamandary óz pikirlerin bildirip atalǵan ózgeristerge qatysty qoldaý tanytty.
