Kúres túrleri álem chempıonaty qarsańynda jańa damý kezeńine ótti
ASTANA. KAZINFORM – 2026 jyldyń birinshi jartyjyldyǵy otandyq kúres úshin jarqyn jeńisterge, tarıhı nátıjelerge jáne ulttyq quramanyń áleýetin aıqyn kórsetken mańyzdy kezeńge aınaldy. Grek-rım, erkin jáne áıelder kúresi boıynsha qazaqstandyq balýandar halyqaralyq jarystarda joǵary nátıje kórsetip, el qorjynyna altyn medaldar men komandalyq jeńister syılady.
Bul jetistikter jekelegen sportshylardyń tabysy ǵana emes, Qazaqstandaǵy kúres mektebiniń júıeli damýyn, jastar rezerviniń nyǵaıýyn jáne Astanada ótetin álem chempıonatyna daıyndyqtyń joǵary deńgeıde ekenin dáleldeıdi.
Qazaqstan kúres federatsııasynyń tóraǵasy Erkin Oqasovtyń bastamasymen kúres túrlerin damytý, óńirlerdegi kúres mektepterin qoldaý, jastar rezervin kúsheıtý jáne halyqaralyq arenadaǵy básekege qabilettilikti arttyrý baǵytynda júıeli jumystar júrgizilip jatyr.
Áıelder kúresi: halyqaralyq deńgeıdegi senimdi serpilis
25 aqpan – 1 naýryz aralyǵynda Albanııanyń Tırana qalasynda ótken Muhammad Malo atyndaǵy reıtıngilik týrnırde áıelder kúresinen Qazaqstan quramasy 3 altyn medal jeńip aldy.
Týrnırdiń chempıondary:
* Zeınep Baıanova (50 kg);
* Laýra Almaǵambetova (55 kg);
* Jámılá Baqbergenova (72 kg).
Bir reıtıngilik týrnırde úsh altyn medal jeńip alý elimizde áıelder kúresiniń birneshe salmaqta birdeı básekege qabiletti ekenin kórsetti.
Bul ulttyq quramanyń bir ǵana kóshbasshyǵa táýeldi emes, halyqaralyq deńgeıde turaqty nátıje kórsete alatyn jańa býyny qalyptasyp kele jatqanyn aıǵaqtaıdy.
Azııa chempıony – Almatbek Amanbek
6-12 sáýir kúnderi Qyrǵyzstannyń Bishkek qalasynda ótken Azııa chempıonatynda Almatbek Amanbek 72 kelige deıingi salmaqta altyn medal jeńip alyp, qurlyq chempıony atandy.
Bul jeńis Qazaqstannyń grek-rım kúresindegi jetekshi pozıtsııasyn taǵy bir márte dáleldedi. Azııa chempıonatyndaǵy altyn medal ulttyq quramanyń álem chempıonaty aldyndaǵy mańyzdy kórsetkishteriniń biri sanalady.
Qazaqstannyń jas balýandary Azııada úzdik atandy
3-6 shilde aralyǵynda Taılandtyń Pattaııa qalasynda ótken U20 Azııa chempıonatynda Qazaqstannyń erkin kúres quramasy jalpykomandalyq esepte birinshi orynǵa ıe boldy.
Qazaqstandyq sportshylar:
* 2 altyn;
* 3 kúmis;
* 2 qola medal jeńip aldy.
Bul nátıje elimizde jas sportshylardy daıarlaý júıesiniń tıimdiligin jáne aldaǵy Olımpıadalyq tsıklge arnalǵan myqty rezerv qalyptasyp jatqanyn kórsetti.
Edige Qasymbek – álemdegi eń bedeldi salmaqtardyń birinde jeńimpaz
15-19 shilde kúnderi Vengrııanyń Býdapesht qalasynda ótken halyqaralyq reıtıngilik týrnırde Edige Qasymbek 125 kelige deıingi salmaqta altynnan alqa taǵyndy. Fınalda qazaqstandyq balýan Polsha ókili Kamıl Tomash Koscholekti jeńdi.
125 keli – álemdik erkin kúrestegi eń bedeldi ári eń joǵary báseke qalyptasqan salmaqtardyń biri. Azııa chempıonatyndaǵy qola júldeden keıin reıtıngilik týrnırde altyn medal jeńip alýy Edige Qasymbektiń turaqty sporttyq formasyn jáne álem chempıonaty aldyndaǵy joǵary daıyndyǵyn kórsetti.
Demeý Jadyraev maýsymdaǵy eń rezonanstyq
jeńisterdiń birine qol jetkizdi
Býdapeshttegi reıtıngilik týrnırdiń eń kóp talqylanǵan beldesýleriniń biri qazaqstandyq balýan, 2024 jylǵy Parıj Olımpıadasynyń kúmis júldegeri Demeý Jadyraev pen Qyrǵyzstannyń ataqty balýany Aqjol Mahmudov arasynda ótti.
Bul beldesýde Demeý Jadyraev eki dúrkin álem chempıony, Tokıo jáne Parıj Olımpıadasynyń júldegeri jáne Azııanyń tórt dúrkin chempıony Aqjol Mahmudovty taza jeńispen (týshe) utty. Eki sportshy halyqaralyq deńgeıde tórtinshi ret kezdesip, olardyń jeke kezdesýlerindegi esep Qazaqstan balýanynyń paıdasyna 2:1 boldy.
Bul jeńis tek týrnır nátıjesi ǵana emes, halyqaralyq kúres qaýymdastyǵy nazar aýdarǵan maýsymdaǵy eń mańyzdy sporttyq oqıǵalardyń birine aınaldy.
Álem chempıonaty aldyndaǵy senimdi qadam
2026 jyldyń alǵashqy alty aıyndaǵy nátıjeler Qazaqstan quramasynyń barlyq baǵyt boıynsha joǵary deńgeıde damyp kele jatqanyn kórsetti.
Áıelder quramasynyń birneshe salmaqtaǵy turaqty jeńisteri, grek-rım kúresindegi Azııa chempıony, jastar quramasynyń qurlyqtaǵy jalpykomandalyq jeńisi, aýyr salmaqtaǵy halyqaralyq altyn jáne álemniń úzdik balýandaryn jeńgen nátıjeler Qazaqstan kúresiniń jańa kezeńge ótkenin aıǵaqtaıdy.
Aldaǵy Astanada ótetin álem chempıonaty qarsańynda bul jetistikter ulttyq quramanyń joǵary áleýetin jáne jankúıerler úmitiniń tolyq negizdi ekenin dáleldeıdi.
