Kúres: Tokıo Olımpıadasyna joldama beriletin alǵashqy álem chempıonaty Astanada ótedi
ASTANA. QazAqparat - Birikken kúres álemi 2019 jyldyń 14-22 qyrkúıegi aralyǵynda Astanadaǵy «Dáýlet» sport saraıynda kúresten álem chempıonaty ótetin resmı túrde málimdedi, dep habarlaıdy QazAqparat tilshisi.
QR Ulttyq olımpıadalyq komıteti baspasóz qyzmetiniń habarlaýynsha, sońǵy jyldary Qazaqstan astanasy birneshe iri sporttyq jarystardy ótkizdi. Onyń ishinde, 2014 jylǵy Azııa chempıonaty men 2018 jylǵy grepplıngten álem chempıonaty bar.
«Astana qalalyq uıymdastyrý komıteti kóńilimizden shyqty. Bizdiń Parıjdegi jetistigimiz ben Býdapeshte ótetin álem chempıonatynan soń Astana sportshylar men bapkerlerge jáne jankúıerlerge arnap joǵary deńgeıli jarys ótkizerine senimdimiz», - dedi Birikken kúres áleminiń prezıdenti Nenad Lalovıch.
Qazaqstandaǵy grek-rım, erkin jáne áıelder kúresi Federatsııasynyń prezıdenti Saýat Myńbaev álem chempıonatyna qatysty óz pikirimen bólisti.
«Mundaı dúbirli dodany bizge senip tapsyrǵanyn maqtanyshpen jetkizgim keledi. Bul bizdiń elimiz úshin úlken sporttyq oqıǵa! 2019 jylǵy álem chempıonaty 2020 jylǵy Tokıo Olımpıadasy aldyndaǵy lıtsenzııalyq báseke bolyp sanalady. Elimizde 2014 jyly kúres túrlerinen Azııa chempıonaty ótkeli beri birneshe iri halyqaralyq týrnır uıymdastyryldy. Sóz joq, mundaı deńgeıdegi týrnır Qazaqstandaǵy kúres túrlerin damytýǵa ólsheýsiz úles qosady», - deıdi Saýat Myńbaev.
2019 jylǵy álem chempıonaty 2020 jylǵy Tokıo Olımpıadasyna joldama taratyn alǵashqy lızentsııalyq týrnır bolmaq.
Árbir olımpıadalyq salmaqtaǵy úzdik alty sportshy óz eline lızentsııa syılaıdy.
2019 jylǵy álem chempıonatynyń bıletteri qańtar aıynan bastap satylymǵa túsedi dep kútilýde.
