Kúres: Tatıana Amanjol Qazaqstanǵa Azııa chempıonatynyń ekinshi altyn medalin jeńip aldy
ASTANA. QazAqparat - Qazaqstandyq palýan qyz Tatıana Amanjol kúresten Azııa chempıony atandy.
Aqtyq synda qandasymyz mońǵol sportshysy Narangerel Erdenesýhty 4:1 esebimen tize búktirdi. Sonymen qatar búgingi jarysta Dáýlet Nııazbekov Qazaqstan qorjynyna qola júlde saldy. Ol úshinshi oryn úshin bolǵan tartysty aıqasta Qyrǵyzstan palýany Bazar Buzargýrýevtan basym tústi.
Aıta keteıik, búginderi Astanada kúresten Azııa chempıonaty ótýde. Alǵashqy jarys kúninde 57 kelige deıingi salmaqta Rasýl Qalıev altyn alyp, elimizdiń qanjyǵasyn maılaǵan bolatyn. Aslah Kahıdze 84 keli salmaqta ekinshi orynǵa qol jetkizse, 125 kelige deıingi salmaqta Dáýlet Shabanbaı úshinshi orynǵa ıe boldy.
Erkin, grek-rım jáne áıelder kúresinen ótip jatqan qurlyqtyq birinshilik 27 sáýirde máresine jetedi.
