Kúres: Parıj Olımpıadasyna joldama qaı qalalarda sarapqa salynady
Halyqaralyq kúres federatsııasy (UWW) 2024 jyly Frantsııa astanasy Parıj qalasynda ótetin Jazǵy Olımpıada oıyndarynyń joldamasy sarapqa salynatyn qalalardy atady.
Alǵashqysy 16-24 qyrkúıek aralyǵynda Serbııa astanasy Belgradtaǵy álem chempıonatynda Olımpıada baǵdarlamasyna kiretin árbir salmaq boıynsha 5 joldama ıesi anyqtalady.
Munda qola medal jolynda jeńilgen eki palýan ózara kúresip, besinshi joldamaǵa ıe bolady.
Іrikteý satysyndaǵy qalǵan eki kezeń 2024 jylǵa josparlanǵan. Azııa qurlyǵynyń balýandary 9-21 sáýir aralyǵynda Qyrǵyzstan astanasy Bishkek qalasyndaǵy irikteý týrnırinde synǵa túsedi.
Onda ár salmaqta fınalǵa shyqqan 2 balýan jazda Parıjge barady.
Al Panamerıka chempıonaty men osy qurlyqtaǵy irikteý dodasynda balýandar Meksıkanyń Akapýlko qalasynda jınalsa, Afrıka men Tynyq muhıty aımaǵynyń elderi Mysyr astanasy Kaırde boz kilemge shyǵady.
Sondaı-aq, eýropalyq bozkilem sheberleri Ázirbaıjan astanasy Bakýde jınalady. Ár qurlyqtaǵy týrnırge 36-kvotadan bólingen. Barlyǵy 144 joldamany quraıdy.
Al 9-12 mamyr aralyǵynda Túrkııanyń Ystanbul qalasynda ótetin sheshýshi kezeńde álem balýandary ár salmaqta qalǵan 3 joldama úshin talasady. Nátıjesinde 54 joldama ıesi anyqtalady.
Aıta ketsek, Olımpıada baǵdarlamasyna 18 salmaq kiredi. Olardyń qatarynda grek-rım kúresinen 60, 67, 77, 87, 97 kelige deıin jáne 130 keliden joǵary, erkin kúresten 57, 65, 74, 86, 97 jáne 125 keli salmaqtaǵy balýandar synǵa túsedi. Áıelder kúresinde 50, 53, 57, 62, 68, 76 keli salmaqtaǵy sportshylar júldelerdi sarapqa salady.
Eske salsaq, budan buryn kúres túrlerinen reıtıngilik týrnırge kimder baratyny anyqtalǵan edi.
