Kúres: Qyzdarǵa senim jetispeıdi - Qazaqstan quramasynyń bas bapkeri
NUR-SULTAN. QazAqparat - 22-26 mamyr kúnderi Italııanyń Sassarı qalasynda áıelder kúresinen «Sassari City Matteo Pellicone Memorial» halyqaralyq týrnıri ótedi, dep habarlaıdy olympic.kz.
Áıelder kúresinen Qazaqstan komandasy atalǵan reıtıngilik dodaǵa qyzý daıyndyq ústinde. Qurama bas bapkeri Nurlan Amanqosov Azııa chempıonatynan keıingi komandanyń jaı-kúıimen tanystyryp, aldaǵy jarystarǵa qatysty boljamymen bólisti.
"Áıelder kúresinen Qazaqstan komandasy Almaty oblysynda oqý-jattyǵý jıyndaryn ótkizýde. Qytaıdaǵy qurlyq chempıonatynan soń qyzdarymyz Italııadaǵy týrnırge attanbaqshy. Sassarı qalasynda ótetin reıtıngilik báseke biz úshin mańyzdy jarystar qatarynda. Óıtkeni, óz jerimizde jalaýy jelbireıtin álem chempıonatyna deıin ótetin úsh iri týrnırdiń biri osy Sassarıdegi saıys. Sondyqtan, balýan qyzdarymyz baryn salady dep úmittenip otyrmyz", - deıdi bas bapker. 
Qytaıdaǵy qurlyq dodasynan qyzdarymyz qolamen ǵana oraldy. Bas jattyqtyrýshy altynsyz qalýdyń sebebin túsindirip, qateliktermen jumys istep jatqanyn jetkizdi.
«Azııada altynsyz qalǵanymyz bárimizdiń ózegimizdi órteıdi. Qyzdarǵa ne jetpedi? Birinshi kezekte, ózderine degen senimi az boldy. Balýan óz kúshine sengende ǵana jeńimpaz atanady. Bizdiń komnadanyń basty qateligi de osynda. Endi sol kemshilikterdiń ornyn toltyrýǵa tyrysyp jatyrmyz. Barlyq ynta-zeıinimizben daıyndyqqa kirisip kettik. Azııa birinshiligi Aına Temirtasova syndy talantty sportshynyń juldyzyn jaqty. Jámıla Baqbergenova da qurlyq jeńimpazyn utyp, kóńilge senim uıalatyp otyr. Tájirıbeli sportshylarymyz da jaman emes», - deıdi ol.
Áıelder kúresinen Qazaqstan komandasy Sassarıdegi týrnırden bólek, Túrkııada ótetin ıAshar Dogý dodasyna jáne Polshada uıymdastyrylatyn halyqaralyq jarysqa qatysady. Sondaı-aq, ulttyq qurama sportshylaryn birlesken oqý-jattyǵý jıyndary da kútip tur. Atap aıtar bolsaq, 6-20 maýsym aralyǵynda Polshada Fınlıandııa, Chehııa, Reseı quramalarymen birlesken oqý-jattyǵý jıyny ótedi. Al álem chempıonaty qarsańynda balýan qyzdarymyz Reseıdiń Sochı qalasynda daıyndyǵyn pysyqtaıdy. 
Italııadaǵy «Sassari City Matteo Pellicone Memorial» týrnırine qatysatyn Qazaqstan komandasynyń quramy:
50 keli: Valentına Islamova
53 keli: Tatıana Ahmetova
55 keli: Marına Sedneva
57 keli: Emma Tısına
59 keli: Mádına Baqbergenova
62 keli: Aıaýlym Qasymova
65 keli: Aına Temirtasova
68 keli: Irına Kazıýlına
72 keli: Jámıla Baqbergenova
75 keli: Elmıra Syzdyqova, Gúlmaral Erkebaeva
Ulttyq qurama úzdikteriniń biri Juldyz Eshimova jaraqatyna baılanysty jarysqa qatyspaıdy. Ol Túrkııadaǵy ıAshar Dogý týrnırinde kúresedi dep kútilýde.
