Kúres federatsııasy tóraǵasy Mańǵystaýda qaza tapqandardyń otbasyna 300 mln teńge bóldi
ASTANA. KAZINFORM — Mańǵystaý oblysynda ótken áskerı oqý-jattyǵý kezinde qaza tapqan áskerı qyzmetshilerdiń otbasylaryna Qazaqstan kúres federatsııasynyń tóraǵasy Erkin Oqasov qoldaý kórsetti.
Erkin Oqasov qara jamylǵan otbasylarǵa jalpy somasy 300 mıllıon teńge kóleminde qarjylaı kómek kórsetti. Qarajat qaza tapqan áskerı qyzmetshilerdiń otbasylaryna baǵyttaldy.
— Bul qaıǵy bárimizge ortaq. El aldyndaǵy mindetin atqaryp júrgen azamattarymyzdan aıyryldyq. Qazir olardyń otbasylary úshin óte aýyr kezeń. Osyndaı kezde kóńil aıtyp qana qoımaı, qoldan kelgenshe naqty qoldaý kórsetý mańyzdy dep esepteımin. Qaza tapqan azamattardyń týǵan-týystary men jaqyndaryna qaıǵyryp kóńil aıtamyn. Marqumdardyń jany jánnatta bolsyn, — dedi Erkin Oqasov.
Qazaqstan kúres federatsııasy qaza tapqan áskerı qyzmetshilerdiń otbasylary men jaqyndarynyń qaıǵysyna ortaqtasatynyn jetkizdi.
Aıta keteıik, 25 qyrkúıek Qazaqstanda Mańǵystaý oblysyndaǵy áskerı qyzmetshilerdiń qazasyna baılanysty Jalpyulttyq aza tutý kúni bolyp jarııalandy.
