Kýrer bolyp jumys isteıtin analar áleýmettik tólemnen aıyrylmaıdy – mınıstrlik
ASTANA. KAZINFORM – Eńbek jáne halyqty áleýmettik qorǵaý salasynyń mamandary áleýmettik jelilerde taraǵan jumys isteıtin analardy áleýmettik tólemderden aıyrý týraly aqparatty joqqa shyǵardy.
Vedomstvonyń málimetinshe, Qazaqstanda kýrer retinde qosymsha jumys isteıtin analardy áleýmettik tólemderden aıyrý josparlanyp otyrǵany týraly jarııalanymdar shyndyqqa sáıkes kelmeıdi.
«Bala kútimin júzege asyratyn jumys istemeıtin ata-analarǵa respýblıkalyq bıýdjet esebinen bala bir jarym jasqa tolǵanǵa deıin memlekettik áleýmettik járdemaqy tólenedi. Bul járdemaqylar alýshynyń keıinnen jumysqa ornalasýyna qaramastan tolyq merzimde tólenedi», – delingen habarlamada.
Al mindetti áleýmettik saqtandyrý júıesine qatysatyn jumys isteıtin ata-analarǵa Memlekettik áleýmettik saqtandyrý qorynan bala kútimine baılanysty tabysynan aıyrylǵan jaǵdaıda áleýmettik tólem taǵaıyndalady.
Vedomstvonyń túsindirýinshe, bul tólemniń mólsheri bala týǵanǵa deıingi sońǵy eki jyldaǵy ortasha aılyq tabystyń 40 paıyzyn quraıdy.
«Áleýmettik kodeks normalaryna sáıkes, atalǵan tólemderdi jumysqa shyǵýyna baılanysty toqtatý tek alýshynyń óz erkimen tıisti ótinish berýi arqyly ǵana júzege asyrylady», – dep atap ótti mınıstrlik.
Sondaı-aq memlekettik organ BAQ ókilderin, blogerler men pablık ákimshilerin resmı aqparatty jarııalaý kezinde azamattardy jańylystyrýy múmkin taqyryptar men tujyrymdardan aýlaq bolýǵa shaqyrdy.
Aıta keteıik, zańsyz dekrettik tólemderge qatysty 40-qa jýyq qylmystyq is qozǵaldy.
