Kúre jolda úzilgen taǵdyrlar: Atyraýda jol apatynyń kóbeıýine ne sebep
ATYRAÝ. KAZINFORM — Atyraý oblysynda jol-kólik oqıǵasy jıi tirkeledi. Bul túıtkil turǵyndardy da, jergilik ákimdik pen polıtsııa qyzmetkerlerin de alańdatyp otyr.
Oblys ákimi apparaty qaýipsizdik jáne quqyqtyq tártipti qamtamasyz etý bóliminiń basshysy Leıla Berdiǵalıevanyń málimetinshe, jol-kólik oqıǵasynan zardap shekkender sany byltyrǵydan 150,6 paıyzǵa ósken.
— Bıyl 11 aıda 812 jol-kólik oqıǵasy tirkeldi. Sonyń saldarynan 1213 adam zardap shegip, jaraqat aldy. Al 91 adam qaza tapty. Kólik júrgizýshileri 145 jaıaý júrginshini qaqqan. Jol boıynda 180 márte betpe-bet soqtyǵysqan, — deıdi Leıla Berdiǵalıeva.
Onyń aıtýynsha, júrgizýshilerdiń jaıaý júrginshilerdi qaǵý deregi Atyraý qalasyndaǵy Qurmanǵazy, L.Vladımırskıı kóshelerinde, sondaı-aq «Nursaıa» shaǵynaýdanynda jıi tirkelgen.
— Jol-kólik oqıǵasynan kámeletke tolmaǵan 330 jasóspirim zardap shekti. Onyń ishinde 9 bala qaza taýyp, 321-i túrli jaraqat aldy. Tórt jetkinshekti jaıaý júrginshilerge arnalǵan jolaqta kólik qaqqan. Al eki bala jol apatynan, taǵy úsheýi ártúrli jaǵdaıda qaza tapty, — deıdi spıker.
Jergilikti polıtsııa qyzmeti basqarmasy bastyǵynyń orynbasary Ádilbek Shahmetovtiń pikirinshe, jol-kólik oqıǵasyna adam faktory áser etedi.
— Adam faktory — aldymen júrgizýshiler. Olardyń jol erejesin buzýyna birneshe sebep áser etedi. Birinshiden, júrgizýshiler óziniń de, kólik salonyndaǵy jolaýshylardyń da ómirin saqtaý turǵysynda jaýapkershilikti sezinbeıdi. Ekinshiden, dittegen jerine tez jetýdi oılap, jyldamdyqty shamadan tys asyrady. Úshinshiden, kólik aıdap kele jatyp, mobıldi telefonmen sóılesedi. Tórtinshiden, joldaǵy manevr jasaý talaptaryn buzady. Besinshiden, aldaǵy kólikti basý ozý qaǵıdasyn buzady. Altynshydan, alkogoldik ishimdik iship, rýlge otyrý, — deıdi Ádilbek Shahmetov.
Oblystyq polıtsııa departamenti baspasóz qyzmetiniń málimetinshe, bıyl jergilikti polıtseıler úshin «Kıber-Sherıf» aqparattyq keshenimen qamtylǵan 28 kólik satyp alynǵan.
Bul qurylǵymen aqpan aıynan beri kólik qozǵalysyna baqylaý júrgizedi.
— Bul — jol erejesin buzatyn, qaýip tóndiretin júrgizýshilerdi tez anyqtaıtyn keshen. Atalǵan qurylǵynyń beınekamerasymen 360 gradýstaǵy kórinisti baqylaýǵa bolady. Bir mezgilde 50 avtokóliktiń jyldamdyǵyn qadaǵalaýǵa múmkindik bar. Jyldamdyqty shekten tys asyrǵan, qarsy baǵytqa shyqqan, kórinbeıtin memlekettik tirkeý nómirleri taǵylǵan, urlanǵan nemese boryshkerler júrgizgen kólikter avtomatty túrde anyqtalady. Quqyq buzýshylyq derekteri polıtsııa qyzmetkerleriniń qatysýynsyz, avtomatty túrde bazaǵa túsedi. Elektrondy hattama qaýlysy 1 apta ishinde kólik ıeleriniń meken jaıyna jiberiledi, — deıdi departament bastyǵy Nurhat Orazbaev.
Onyń deregine súıensek, patrýldik polıtsııa qyzmetkerlerine 4 áýe drony, 8 «Orakýl-Insaıt» mobıldi-tasymalaý qurylǵysy berilgen. Al 15 baǵanaǵa «Trafık-Skaner» statsıonarlyq jyldamdyq ólshegish qurylǵysy ornatylǵan.
Atyraý oblysynyń ákimi Serik Shápkenovtiń pikirinshe, jol-kólik oqıǵalarynyń aldyn alýǵa basymdyq berilýi kerek. Mundaı is-shara ásirese Atyraý qalasynda kóbirek qolǵa alynǵany jón.
— Jol qaýipsizdigin qamtamasyz etý maqsatynda qajetti qural-jabdyqtar, arnaıy kólikter satyp alyndy. Biraq áli kúnge deıin statıstıkalyq kórsetkish kóńil kónshitpeıdi. Eń ókinishtisi, jol apaty qurbandarynyń basym kópshiligi — balalar. Osyǵan baılanysty vedomstvoaralyq komıssııa jaıaý júrginshiler men jol qozǵalysyndaǵy qaýipsizdikti qamtamasyz etý úshin naqty usynystar ázirleýi qajet. Taldaý júrgizýge jáne naqty sheshim qabyldaýǵa qajetti aqparat bar, — deıdi Serik Shápkenov.
Eske sala ketelik, budan buryn Atyraýda jyl basynan beri kólik róline otyrǵan 732 mas júrgizýshi ustalǵanyn habarlaǵan edik.
