Kúre jol: Tapsyrys berýshi tarapynan baqylaý bolmaıynsha kemshilikter joıylmaıdy - maman
ORAL. KAZINFORM – Jol qurylysy kezinde sapaǵa erekshe mańyz beriledi. Osy oraıda Batys Qazaqstan oblysynda qandaı jumystar atqarylyp otyr, negizgi túıtkilder qandaı?
«Jol aktıvteriniń ulttyq sapa ortalyǵy» RMK BQO fılıalynyń bólim basshysy Dáýren Ámirovtiń jaýap bergenindeı, ótken jyly respýblıkalyq jáne jergilikti mańyzy bar joldarda 93 nysanda, 48 kóshe-jol jelisinde saraptama jumystary júrgizilgen.
Dáýren Manarbekulynyń sózine qaraǵanda, mekeme júrgizgen barlyǵy 638 ınspektsııalyq tekseris nátıjesinde 2 myńǵa jýyq materıal synamasy iriktelip alynyp, synaldy. Sonyń ishinde jol-qurylys materıal synamalarynyń 27 paıyzy normatıvtik talaptarǵa saı kelmegen.
Sonymen qatar tekseris barysynda 369 kemshilik pen buzýshylyq anyqtalsa, sonyń 135-i kúni búginge deıin joıylǵan joq. Olqylyq pen sáıkessizdikterdi joıý boıynsha ýákiletti organdarǵa 137 hat joldandy. Sonyń ishinde saraptama qorytyndysyna sáıkes joldanǵan 12 hat negizinde BQO memlekettik sáýlet-qurylys baqylaýy basqarmasy 3 mln 735,4 myń teńge kóleminde aıyppul saldy. Qalǵan 125 hat aýdan jáne aýyldyq okrýg ákimdikterine jiberildi.
- Bul rette mınıstrlikte birneshe jıyn ótkizilip, kemshilikter men sáıkessizdikter anyqtalǵanymen, olardy joıý boıynsha sharalar qabyldanbaǵanyna ekpin túsirgim keledi. Munyń negizgi sebepteri – tapsyrys berýshi, sondaı-aq merdiger jáne tehnıkalyq qadaǵalaý tarapynan baqylaý jetkiliksiz. Ekinshiden, merdigerler men tehnıkalyq qadaǵalaýdyń jeke zerthanalary joq. Úshinshiden, qurylys materıaldarynyń kiris jáne operatsııalyq baqylaý jumystary júrgizilmeıdi, - deıdi D.Ámirov.
Mamannyń málimdeýinshe, taǵy bir aıtatyn jaıt, kóbinese respýblıkalyq jáne oblystyq mańyzy bar joldarda kemshilik-sáıkessizdikter joıylyp jatady. Al aýdandyq joldar men kóshe-jol jelisinde bul jumys joqtyń qasy.
Basty sebepterdiń biri – nysandarda jóndeý jumystary qurylys maýsymynyń ortasynda nemese sońynda bastalady. Sol sebepti merdigerler jumysy kidiredi. Ýaqytyly aıaqtamaǵan soń bul sapaǵa da áser etedi. Qolaısyz aýa raıyna tap bolyp, sýyq túsýine baılanysty kemshilikterdi joıyp úlgere almaıdy.
Ótken jyly «Jol aktıvteriniń ulttyq sapa ortalyǵy» nazarynan barlyq asfaltbeton zaýyttary da tys qalǵan joq. Sonda 24 zaýyttyń 14-i talapqa saı kelmeıtini belgili boldy. Bulaı jalǵasa berse, munyń sońy sapasyz asfaltbeton qospasyn óndirýine soqtyrýy múmkin.
- Qyzylorda qalasynda ótken V Ulttyq quryltaıda Memleket basshysy jol qurylysyna baılanysty barlyq jumystyń sapaly ári ýaqytyly oryndalýy qajettigin atap kórsetti. Bul jol sapasy qyzmetkerlerine de úlken jaýapkershilik júkteıdi. Qazirgi tańda respýblıkalyq mańyzy bar avtomobıl joldarynyń qysqy kútim jumystaryna baqylaý júrgizýdemiz. Jyl basynan beri 14 ınspektsııalyq tekseris nátıjesinde kóktaıǵaqqa qarsy 11 qumdy-tuzdy qospa synamasy iriktelip alynyp, synaldy. Oǵan qosa tekseris barysynda 21 kemshilik pen buzýshylyq anyqtaldy. Kelisim-sharttyń jáne jospar-kesteniń joqtyǵyna baılanysty oblystyq jáne aýdandyq mańyzy bar joldarǵa bizdiń tarapymyzdan baqylaý júrgizilmeıdi, - dep qosty D.Ámirov.
Budan buryn BQO joldarynyń sapasyn teksergen kezde 250-den astam aqaý anyqtalǵanyn jazǵan edik.