Kúre jol boıynda bıznes ashqan kásipkerlerdi yntalandyrý kerek – Premer-Mınıstr
ASTANA. KAZINFORM – QR Premer-mınıstri Oljas Bektenov eldegi búkil ınfraqurylymǵa – áýejaılardan bastap qonaq úılerge, saýda núktelerine, tamaqtaný oryndaryna, kontsert alańdaryna deıin qaýipsizdik pen jaılylyq turǵysynan revızııa júrgizýdi tapsyrdy. Bul týraly Premer eldegi týrızm salasyn damytý jáne tsıfrlandyrý týraly Úkimet otyrysynda aıtty.
− Týrızmdi damytý salasynda qabyldanyp jatqan barlyq shara keshendi túrde júrýge tıis. Osyǵan baılanysty Týrızm jáne sport mınıstrligi Tsıfrlyq damý mınıstrligimen birlesip, 3 aıda týrızmniń biryńǵaı tsıfrlyq ekojúıesin qurý jónindegi naqty is-sharalar josparyn bekitýi kerek. Kýrorttyq aımaqtar men tabıǵı parkterdiń bas josparlaryn tsıfrlandyrýǵa erekshe nazar aýdarý qajet. Sondaı-aq ulttyq týrıstik portalǵa kirýge múmkindik beretin QR-kodtardy áýejaılarda, vokzaldar men shekara beketterinde, týrıster kóp jınalatyn jerlerde ornalastyrý qajet, − dedi O.Bektenov Úkimettiń búgingi otyrysynda.
Sonymen birge Úkimet basshysy óńir ákimdikterine 2 aıda barlyq mádenı, oqıǵalyq, sporttyq jáne basqa da is-sharalardyń biryńǵaı kúntizbesin bekitýdi tapsyrdy.
Mádenıet, Syrtqy ister mınıstrlikterimen birlesip, el ishinde jáne shetelderde Qazaqstannyń týrıstik áleýeti týraly belsendi aqparattyq naýqan ótkizý kerek. Ótinim berý rásimderin tolyǵymen tsıfrlandyrý arqyly Neo Nomad Visa-ny tanymal etý qajet. Qoryta aıtqanda, ıkemdi vızalyq saıasat júrgizilýge tıis.
− Óńir ákimderi týrıstik obektilerdi qajetti ınfraqurylymmen qamtamasyz etýi kerek. Kólik, Saýda, Ulttyq ekonomıka, Týrızm mınıstrlikteri men ákimdikter jol boıyndaǵy servısti jaqsartý jumystaryn jalǵastyrsyn. Kúre jol boıyndaǵy dámhanalar, janarmaı quıý beketteri men tehnıkalyq qyzmet kórsetý stantsııalary qabyldanǵan standarttarǵa saı bolýy kerek. Sondaı-aq osy bızneste jumys isteıtin kásipkerlerdi yntalandyrý máselesin pysyqtaýdy tapsyramyn. Bul rette týrıster qaýipsizdigin arttyrýǵa erekshe nazar aýdarylsyn. Búkil ınfraqurylymǵa – áýejaılardan bastap qonaq úılerge, saýda núktelerine, tamaqtaný oryndaryna, kontsert alańdaryna deıin – qaýipsizdik pen jaılylyq turǵysynan revızııa júrgizilýi qajet, − dedi Premer-Mınıstr.
Aıta keteıik, sońǵy 5 jylda Qazaqstandaǵy týrıster sany 7,5 ese ósti. Byltyr elimizge 15 mln-nan astam adam saıahattap kelgen.
«Astana Kontsert» kompanııasynyń prodıýseri Málik Hasenov amerıkalyq aktrısa jáne ánshi Djennıfer Lopestiń Astanada ótetin kontsertinen qansha ekonomıkalyq paıda túsetinin aıtty.