Kúrdistannyń jumysshy partııasy Irakta óz erkimen qarýyn tastady
ASTANA. KAZINFORM – Túrkııada tyıym salynǵan Kúrdistannyń jumysshy partııasy (KJP) Soltústik Iraktaǵy rásim kezinde óz jaýyngerleriniń óz erikterimen qarýlaryn tastap, ony «jaǵyp» jibergenin rastady, dep jazady reseılik TASS.
Bul týraly Túrkııanyń Halk TV jáne kúrdterdiń Rudaw arnasy habarlaǵan.
- Biz munda KJP kóshbasshysy Abdýlla Odjalannyń 2025 jyldyń 19 maýsymyndaǵy úndeýine oraı keldik. Sondaı-aq bizdiń kelýimizge KJP-nyń 5-7 mamyrda ótken 12-shi Seziniń sheshimi de negiz boldy. Biz búgin qarýdy óz erkimizben joıyp otyrmyz. Bizdiń bul qadamymyz halqymyzǵa, ásirese áıelder men jastarǵa, Túrkııa men Taıaý Shyǵys halqyna, jalpy adamzatqa paıdasyn tıgizedi degen úmittemiz. Biz óńirlik jáne álemdik derjavalardy bizdiń halqymyzdyń zańdy, demokratııalyq quqyqtaryn syılaýǵa jáne beıbit, demokratııalyq retteý protsesin qoldaýǵa shaqyramyz, - dep keltirdi partııanyń málimdemesin telearnalar.
Osyǵan deıin Kúrdistannyń jumysshy partııasynyń ókilderi Irakta qarýlaryn tapsyratyny týraly jazǵan bolatynbyz.