Kúrdistanyń jumysshy partııasyn qarýsyzdandyrý isi qyrkúıekte aıaqtalady

ASTANA. KAZINFORM – Ankara tyıym salǵan Kúrdistannyń jumysshy partııasyn (KJP) qarýsyzdandyrý úderisin qyrkúıek aıynda aıaqtaý josparlanyp otyr, dep habarlaıdy reseılik TASS.

Bul jumystyń júzege asyrylý barysyn kúndiz-túni Túrkııanyń Ulttyq barlaý uıymy júzege asyrady, dep jazady Yeni Şafak basylymy.

Ol keltirgen málimetterge qaraǵanda, kúrd sodyrlarynyń qarý ótkizý jónindegi endigi kezeńderi BAQ betterinde jarııalanbaıdy.

Qarý Iraktyń arnaıy belgilengen jerinde ótkiziledi. Barlyǵy 250 adam bolatyn KJM jetekshilerine Túrkııa men Iraktyń shekaralas aýdandary men Sırııada júrýine ruqsat etilmeıdi.

Olar úshinshi elderge bara alady, alaıda olardyń barlyǵynyń bir jerge shoǵyrlanýyna múmkindik berilmeıdi, dep naqtylady túrkııalyq arnaıy qyzmet ókilderi.

KJP-nyń 30 adamnan turatyn alǵashqy toby qarýlaryn 11 shilde kúni tapsyrdy. Qarý tapsyrý rásimi Irak Kúrdistanynyń bóligi sanalatyn Sýleımanııa provıntsııasynda ótti.

Terrorıstik áreketteri úshin ómir boıyna bas bostandyǵynan aıyrylyp, jazasyn Túrkııada ótep jatqan KJP kóshbasshysy Abdýlla Odjalan 2025 jyldyń aqpanynda uıymmen baılanysty barlyq qurylymdardy qarýlaryn tastap, Túrkııamen qarýly qaqtyǵysty toqtatýǵa shaqyrdy. Respýblıka bıligimen 50 jyldan astam ýaqyt qarsylasyp kelgen partııa mamyr aıynda uıymdy taratý týraly sheshim qabyldady.