Kúrdistan jumysshy partııasy Túrkııa úkimetimen bitimge keletinin jarııalady

ASTANA. KAZINFORM – Kúrdistan jumysshy partııasy (Qazaqstanda tyıym salynǵan - red.) 1 naýryz kúni Túrkııa úkimetimen bitimge keletinin jarııalap, 40 jylǵa sozylǵan «avtonomııa úshin kúresti» aıaqtaıtynyn málimdedi. Bul týraly sıngapýrlyq Lianhe Zaobao basylymy habarlady.

Uıymǵa táýeldi qarýly kúshter túrmede otyrǵan partııa jetekshisi Abdýlla Ojalannyń úndeýine saı atys-shabysty toqtatyp, qarýlaryn tastamaq jáne tolyqtaı taratylmaq.

Sonymen qatar KJP (Qazaqstanda tyıym salynǵan - red.) Túrkııa úkimetinen Ojalandy bosatýdy talap etip otyr. Málimdemede tek Ojalannyń basshylyǵymen ǵana bitimge kelýge jáne qarýsyzdandyrýǵa qol jetkizýge bolatyny basa aıtylǵan.

Ojalan 27 aqpan kúni jasaǵan málimdemesinde partııalastaryn qarý tastaýǵa shaqyryp, KJP ózdiginen taratylýy qajet ekenin málimdegen ári osy úshin tarıhı jaýapkershilikti óz moınyna alýǵa daıyn ekenin aıtqan.

Basylymnyń jazýynsha, Ojalan 1999 jyly Túrkııa úkimetine qoldy bolyp, Ystanbul mańyndaǵy Imraly aralyndaǵy túrmege qamalǵan. 2012 jyldyń qazan aıynan beri Túrkııa úkimeti Ojalanmen «Kúrdistan máselesin» sheshýge baǵyttalǵan beıbitshilik kelissózin júrgizip keledi.

KJP 1979 jyly qurylǵan. Uıym «qarýly kúres» arqyly Túrkııa, Irak, Iran jáne Sırııa shekaralary túıilisetin aımaqta táýelsiz «Kúrdistan memleketin» ornatýdy kózdeıdi. Álemniń kóptegen eli KJP-ny lańkestik uıym dep tanıdy.

Izraıl premer-mınıstri táýelsiz Kúrdistan memleketin qurý ıdeıasyn qoldaǵanyn jazǵan bolatynbyz.