Kúrdeli jóndeýden ótken Shymkenttiń ortalyq meshiti Ramazan aıynda el ıgiligine berildi
Meshittiń qaıta ashylý rásiminde Shymkent qalasynyń ákimi Ǵabıdolla Ábdirahymov barsha musylmandarǵa Ramazan aıyndaǵy tutqan oraza, etken qulshylyqtary qabyl bolsyn degen tilek aıtty.
«Meshit - Allanyń úıi. Munda tek izgilikti, bereke-birlikti, jaqsylyqty dáripteýimiz kerek. Elbasymyzdyń ustanǵan salıqaly saıasatyn Haq dinimizben ushtastyryp, paıǵambarymyz salǵan aq joldan aýytqymaı elge, Otanǵa qyzmet etýimiz qajet», - dedi shahar basshysy Ǵabıdolla Ábdirahymov.
Aıta keteıik, Qoshqar ata ózeni jaǵalaýynda oryn tepken «Abdýl Hamıd Qattanı» meshiti 1997 jyly Saýd Arabııasyna qarasty Qattanı aýylynyń azamaty Abdýl Hamıd Qattanıdiń demeýshiligimen salynǵan. Sodan beri kúrdeli jóndeý kórmegen qulshylyq úıiniń ishki-syrtqy kelbeti azdap eskire bastaǵan. Osyǵan oraı, meshit ákimshisi, bas ımam Baqdáýlet Ábdirahymov onyń ishin jóndeýge shahar basshysynan kómek suraǵan edi.
Qulshylyq úıiniń kólemi 845,5 sharshy metrdi qurap, ishki sıymdylyǵy 800 oryndyq bolsa, syrtymen qosa eseptegende 2000 adam bir ýaqytta namaz oqı alady. 2006 jyly kúmbez jańartylyp, altyn tústes sary metalmen qaptalǵan.
Munda arnaıy kitaphana, dárishana bólmeleri jumys isteıdi. Budan bólek, ómirden qajyǵan jandarǵa rýhanı kómek kórsetý maqsatynda «sabyrlylyq» bólmesi ashylǵan.
Kúrdeli jóndeýden ótken meshittiń aınalasy elektr shamdarmen jaryqtandyrylyp, jeke jylytý gaz qondyrǵysy ornatyldy. Ári, aýlasynda 100 avtokólikke laıyqtalǵan arnaıy avtoturaq salyndy. Nysannyń ishki qaspetin Tashkentten kelgen ustalar árlep shyqqan. Aıta keterligi, qulshylyq úıiniń ishindegi ultymyzdyń baǵzy oıý-órnekterin meshit ákimshiligi óz tarapynan qostyrǵan. Sondaı-aq meshittiń jurtqa qoljetimdi bolýy úshin aldyndaǵy qorǵan-qorshaýlar túgeldeı alynyp, jan-jaǵyndaǵy saýda-sattyqpen aınalysatyn dúńgirshekter basqa jaqqa kóshirildi.
«Bul áýeli din men dástúr sabaqtastyǵy bolsa, ekinshiden, Shymqalaǵa kelgen týrıster úshin ulttyq dúnıetanymdy nasıhattaý», - deıdi meshit ákimshisi.
