Kúrdeli jóndelgen joldardyń sapasy kóńil kónshitpeıdi - SQO
PETROPAVL. QazAqparat – Soltústik Qazaqstan oblysynda Sybaılas jemqorlyqqa qarsy qyzmet jáne qoǵam belsendilerinen quralǵan monıtorıng top kúrdeli jóndelgen jáne qabyldanýy tıis eki jol ýchaskesiniń jaǵdaıyn kórdi, dep habarlaıdy QazAqparat tilshisi.
SQO Sybaılas jemqorlyqqa qarsy qyzmettiń málimetinshe, Jolaýshylar kóligi jáne avtomobıl joldary basqarmasy uıymdastyrǵan is-sharaǵa Sybaılas jemqorlyqqa qarsy qyzmet jáne qoǵam ókilderi qatysty.
Monıtorıng top barǵan alǵashqy ýchaske «Astrahanka-Smırnovo-Qııaly- Taıynsha» avtojoly. Uzyndyǵy 15 km. Tapsyrys berýshi kelisim boıynsha «Kokshetaýavtodor» JShS atqarylǵan jumys úshin 507,5 mln teńge shamasynda berýi qajet.
«Jóndeý jumystary barysynda turǵyndar tarapynan biraz aryz-shaǵym boldy. Jol jıekteri durys istelmegen, asfalt jabyndysynyń eni tym tar jáne keı ýchaskelerde oıyqtar bolǵan. Osy shaǵymdar boıynsha eskertý aıtyldy. Joldyń shetin bekitýge baılanysty uıǵarymdardyń biri áli oryndalǵan joq, merzim 7 qarashaǵa deıin», - deıdi arnaıy monıtorıng tobynyń jetekshisi Aleksandr Bodýnovskıı.
Tekserý barysynda monıtorıngtik top birqatar olqylyqty anyqtady: jol keı jerlerde jaryla bastaǵan, oıyqtar paıda bolǵan. Jol belgileri anyq kórinbeıdi.
Merdiger «Kokshetaýavtodor» JShS ókiliniń aıtýynsha, kemshilikter osy aptada joıylady. Al jarylǵan jerdiń asfalti endi tek kún jylynǵasyn ǵana qaıta tóselmek.
Mamandardyń aıtýynsha, asfaltqa salynatyn jol belgileri tez óshiriledi.
Oǵan tek birer aıǵa ǵana kepildeme bar. Sol sebepti joldy qabyldaýda únemi osy másele aldan shyǵady.
«Jolaýshylar kóligi men avtomobıl joldary basqarmasy mamandarynyń aıtýynsha, smetalyq baǵasy 500 myń teńge turatyn jol belgileriniń kepildik merzimi nebári 2 aı. Keıin ýchaske qoldanysqa berilgen soń memlekettik organ ony qaıta salý úshin taǵy kompanııalardy jaldaıdy. Bul durys emes», - deıdi Aleksandr Bodýnovskıı.
Monıtorıng toby barǵan ekinshi nysan - «Kazgorodok-Gorkovskoe» avtojolynda ornalasqan. 15,328 km joldy jóndeýge bıýdjetten 721 mln jýyq teńge jumsaldy. Mundaǵy jol sapasy jaqsy, alaıda jol jıekterin qalypqa keltirý qajet. Merdiger kompanııa – «Kókshetaý joldary» JShS ony taıaý kúnderi jóndeıtin boldy.
