Kúrdeli syrtqy konıýnktýraǵa qaramastan, el ekonomıkasy damý ústinde — Bektenov
ASTANA. KAZINFORM — Oljas Bektenov Ekonomıkalyq saıasat jónindegi keńestiń otyrysyn ótkizdi. Bul týraly Úkimettiń baspasóz qyzmeti habarlady.
Memleket basshysy Qasym-Jomart Toqaevtyń tapsyrmalaryn oryndaý aıasynda ekonomıkanyń ósýin qamtamasyz etý jáne halyqtyń ál-aýqatyn jaqsartý boıynsha júrgizilip jatqan jumystar qaraldy.
Otyrysqa Ulttyq bank tóraǵasy Tımýr Súleımenov, Premer-mınıstrdiń orynbasary — ulttyq ekonomıka mınıstri Serik Jumanǵarın, Premer-mınıstrdiń orynbasary Qanat Bozymbaev, Premer-mınıstrdiń orynbasary — jasandy ıntellekt jáne tsıfrlyq damý mınıstri Jaslan Mádıev, Prezıdent Ákimshiligi basshysynyń orynbasary Erbolat Dosaev, Qarjy, Ónerkásip jáne qurylys mınıstrlikteriniń, Qarjy naryǵyn retteý jáne damytý, Strategııalyq josparlaý jáne reformalar agenttikteriniń basshylyǵy jáne taǵy basqalar qatysty.
2025 jylǵy 11 aıdyń qorytyndysy boıynsha el ekonomıkasynyń ósýi 6,4%-dy qurady. Makroekonomıkalyq turaqtylyqty qamtamasyz etý jáne halyqtyń tabysyn arttyrý maqsatynda Prezıdent tapsyrmasy boıynsha ázirlengen Úkimettiń, Ulttyq banktiń jáne Qarjy naryǵyn retteý jáne damytý agenttiginiń 2026-2028 jyldarǵa arnalǵan halyqtyń ál-aýqatyn turaqtandyrý jáne arttyrý jónindegi birlesken is-qımyl baǵdarlamasy júzege asyrylyp jatyr. Júrgizilip jatqan bıýdjettik-salyqtyq reformalar fıskaldyq saıasatty jańǵyrtýǵa jáne bıznes úshin ákimshilik kedergilerdi keshendi túrde tómendetýge baǵyttalǵan.
Sondaı-aq jıynda 2026 jyldyń negizgi syrtqy jáne ishki syn-qaterleri qaraldy, jahandyq ekonomıkadaǵy ósimniń baıaýlaýy týraly boljamdar bar trendter usynyldy. Keńes músheleri ekonomıkanyń turaqty ósýin qamtamasyz etý, ónimdi jumys oryndaryn qurý jáne medıandyq jalaqy mólsherin arttyrý boıynsha aldaǵy sharalardy talqylady. Naryqty otandyq taýarlarmen tolyqtyrýǵa baǵyttalǵan ımportty almastyrý boıynsha júrgizilip jatqan jumystar, onyń ishinde «Investıtsııaǵa tapsyrys» baǵdarlamasy halyqtyń tabysyn qoldaýǵa yqpal etpek.
Qazaqstandyq ónimderdiń sapasyn jaqsartý jáne zamanaýı tehnologııalardy engizý arqyly básekege qabilettiligin arttyrýdyń mańyzdylyǵy atap ótildi. Búgingi tańda Qazaqstan ekonomıkasy álemdik naryqtarǵa daıyn ónim eksportyn ulǵaıta otyryp, shıkizat eksportynan josparly túrde bas tartyp jatyr, bul óz kezeginde ártaraptandyrylǵan qurylymnyń qalyptasqanyn aıǵaqtaıdy.
Sondaı-aq ınfraqurylymdyq jobalardy júzege asyrýdaǵy jeke ınvestıtsııalardyń úlesin arttyrýǵa nazar aýdaryldy. Ekonomıkanyń naqty sektoryn qarjylandyrýdaǵy ekinshi deńgeıli bankterdiń rólin arttyrý jáne sheteldik ınvestıtsııalardy mýltıplıkatıvtik áseri bar iri jobalarǵa baǵdarlaý qajettigi atap ótildi. Premer-mınıstr ınflıatsııa deńgeıin tómendetý mindetine basymdyq beriletinin atap ótti. Bul jerde másele azyq-túlik jáne azyq-túlik emes taýarlardyń, qyzmetter baǵasynyń turaqty tómendeýi týraly bolyp otyr.
— Kúrdeli syrtqy konıýnktýraǵa qaramastan, elimizdiń ekonomıkasy damý ústinde. Qurylymdary boıynsha qarasaq, óńdeý, qurylys, saýda jáne kólik salasy ósip jatyr. ıAǵnı, ósim teń jaǵdaıda júrip jatyr. Biz ınflıatsııa boıynsha tómendeý úrdisin kórip otyrmyz. Baǵytymyz — ınflıatsııany tómendetý boıynsha aldymyzǵa qoıylǵan mindetterdi sapaly oryndaý, — dep atap ótti Oljas Bektenov.
Otyrys qorytyndysy boıynsha Ulttyq ekonomıka mınıstrligine Ulttyq bankpen, Strategııalyq josparlaý jáne reformalar, Qarjy naryǵyn retteý jáne damytý agenttikterimen birlesip, ekonomıkalyq ahýalǵa monıtorıng júrgizý jáne yqtımal táýekelderdiń aldyn alý jóninde kelisilgen is-qımyldardy jedel júzege asyrý tapsyryldy.
Budan buryn Premer-mınıstr mereke kúnderi qoǵamdyq qaýipsizdikti kúsheıtýdi tapsyrǵan edi.