Kúrdeli syrtqy ekonomıkalyq ahýalǵa qaramastan shıkizattyq emes sektor básekege qabilettiligin kórsetti — Bektenov
ASTANA. KAZINFORM — Bıyl 3 aıda jalpy ishki ónim naqty 3 paıyzǵa ósti. Bul týraly Premer-mınıstr Oljas Bektenov aıtty.
— Memleket basshysy Úkimettiń keńeıtilgen otyrysynda sapaly ári ornyqty ekonomıkalyq ósimdi qamtamasyz etýdi tapsyrdy. Bul mindet óńdeý ónerkásibin damytý, ınvestıtsııalyq belsendilikti arttyrý, óndiris oryndaryn tehnologııalyq jańǵyrtý arqyly iske asyrylýda. Búgin biz osy jyldyń birinshi toqsany boıynsha elimizdiń áleýmettik-ekonomıkalyq damý qorytyndysy men respýblıkalyq bıýdjettiń atqarylý barysyn qaraımyz, — dedi Úkimet otyrysynan ashqan Oljas Bektenov.
Premer-mınıstrdiń atap ótýinshe, atalǵan kezeńde jalpy ishki ónim naqty 3 paıyzǵa ósti.
— Bul kórsetkish shıkizattyq emes sektorda, onyń ishinde óńdeý ónerkásibindegi kólik, qurylys, saýda salalaryndaǵy ornyqty ósim esebinen qamtamasyz etilgenin aıta ketý kerek. Kúrdeli syrtqy ekonomıkalyq ahýalǵa qaramastan osy shıkizattyq emes sektor óziniń turaqtylyǵymen básekege qabilettiligin kórsetip otyr, — dedi Úkimet basshysy.
Aıta keteıik, Úkimet 3 aıdyń áleýmettik-ekonomıkalyq damý qorytyndysyn qarap jatyr.
