Kúrdeli órt qaýpi maýsymyna qaramastan Býrabaı ormandary saqtaldy

ASTANA. KAZINFORM - «Býrabaı» memlekettik ulttyq tabıǵı parkinde órt qaýipti maýsym aıaqtaldy. Qurǵaqshylyqqa, jıi bolǵan naızaǵaılarǵa jáne týrıster sanynyń rekordtyq deńgeıge jetýine qaramastan, iri orman órtteriniń aldyn alyp, orman alqaptaryn saqtap qalý múmkin boldy.

Kúrdeli órt qaýpi maýsymyna qaramastan Býrabaı ormandary saqtaldy
Foto: "Býrabaı" MUTP

Bul nátıjege ulttyq park qyzmetkerleriniń úılesimdi jumysy, órt oshaqtaryna jedel áreket etýi jáne zamanaýı monıtorıng júıelerin qoldanýynyń arqasynda qol jetkizildi.

Býrabaı parki
Foto: Evgenııa Emelıanova

Órt qaýpi joǵary maýsym 2026 jylǵy 6 sáýirden 10 qarashaǵa deıin sozyldy. Jeti aı boıy orman alqaptarynda órt shyǵý qaýpi joǵary boldy. Aýa temperatýrasynyń kóterilýi, jaýyn-shashynnyń azdyǵy jáne naızaǵaıdyń jıi túsýi órttiń tutanýyna ári tez taralýyna qolaıly jaǵdaı týǵyzdy. Týrıster aǵyny da qosymsha júkteme túsirdi. Bıyl ulttyq parkke shamamen 1,4 mln adam kelgen. Bul ótken jylǵy kórsetkishten 6 paıyzǵa kóp.

Osyndaı jaǵdaıda ulttyq park qyzmetkerleriniń basty mindeti órttiń taralýyna jol bermeý jáne ormandy saqtaý boldy. Osy maqsatta aýmaqty táýlik boıy baqylaý uıymdastyrylyp, patrýldeý kúsheıtildi jáne órt sóndirý bólimsheleriniń turaqty daıyndyǵy qamtamasyz etildi.

Býrabaı
Foto: Evgenııa Emelıanova

Orman órtterin erte anyqtaýǵa arnalǵan SMART júıesi mańyzdy ról atqardy. Onyń kómegimen órt oshaqtary der kezinde anyqtalyp, oqıǵa ornyna órt sóndirý jasaqtary jedel jiberildi. Degenmen sheshýshi róldi kúrdeli tabıǵı jaǵdaılarda, sonyń ishinde jetýi qıyn taýly aýmaqtarda jumys isteýge týra kelgen qyzmetkerlerdiń kásibı ári shuǵyl áreketi atqardy.

-Ormanda órtti der kezinde anyqtaý jáne oǵan jedel áreket etý asa mańyzdy. Órt týraly aqparat neǵurlym erte tússe, ony toqtatýǵa múmkindik soǵurlym joǵary bolady. Sondyqtan biz tehnıkalyq jaraqtandyrýǵa jáne qyzmetkerlerdiń daıyndyǵyna erekshe kóńil bólemiz, – dedi «Býrabaı» MUTP Jedel basqarý ortalyǵynyń basshysy Asylhan Ahmetjanov.

Býrabaı
Foto: Evgenııa Emelıanova

Ulttyq park órt qaýpi joǵary maýsymǵa aldyn ala daıyndaldy. Ártúrli deńgeıdegi 37 órt-taktıkalyq oqý-jattyǵý ótkizildi. Órtpen kúresýge 16 órt sóndirý avtokóligi, jeti shaǵyn orman órt sóndirý kesheni jáne basqa da arnaıy tehnıka jumyldyryldy. Qajet bolǵan jaǵdaıda órt sóndirý jumystaryna Aqmola oblysynyń Tótenshe jaǵdaılar departamenti men «Qazavıaormanqorǵaý» mekemesiniń kúshteri tartyldy.

Sonymen qatar memlekettik ınspektorlar profılaktıkalyq reıdter júrgizip, órt qaýipsizdigi talaptarynyń saqtalýyn qadaǵalady jáne týrısterge ormanda qaýipsiz júrip-turý qaǵıdalaryn túsindirdi. Ulttyq park aýmaǵynda ot jaqqany úshin bes adamǵa árqaısysyna 100 AEK mólsherinde aıyppul salyndy.

Býrabaı
Foto: Evgenııa Emelıanova

Atqarylǵan jumystardyń nátıjesinde aýqymdy orman órtteriniń aldyn alýǵa qol jetkizildi. Maýsym boıy ulttyq park aýmaǵynda 15 órt oqıǵasy tirkelip, olardyń jalpy aýmaǵy nebári 1,4 gektardy qurady. Órtterdiń basym bóligi naızaǵaı túsýinen týyndaǵan.

Órt oshaqtarynyń birqatary jetýi qıyn taýly jerlerde bolǵandyqtan, ol jaqqa adamdar men tehnıkany jetkizý qosymsha ýaqytty talap etti. Soǵan qaramastan, órttiń úlken aýmaqtarǵa taralýyna jol berilgen joq.

Býrabaı
Foto: Evgenııa Emelıanova

Órt qaýpi joǵary maýsymnyń aıaqtalýy ormandy qorǵaý jumystary toqtaıdy degendi bildirmeıdi. Ulttyq parkte aýmaqty baqylaý, qyzmetkerlerdi daıarlaý jáne profılaktıkalyq is-sharalar jalǵasady.

Basty basymdyq – Býrabaıdyń biregeı tabıǵatyn keleshek urpaq úshin saqtap qalý.

Jetisý oblysy Sarqan aýdany Borlytóbe orman sharýashylyǵynyń Quraqsý ormanshylyǵy aýmaǵynda qurǵaq shóp pen qamys órtenip, órtti sóndirýge tikushaq tartýǵa týra keldi.