Kúrdeli qarjylyq operatsııalar men sheteldegi aktıvterdi tekserýge qosymsha mamandar tartylýy múmkin
ASTANA. KAZINFORM – Aktıvterdi qaıtarý jónindegi komıtettiń fýnktsııalary men ókilettikterin qaıta uıymdastyrýǵa baılanysty birqatar normatıvtik normalar naqtylanyp jatyr. Bul týraly komıtet Kazinform agenttiginiń saýalyna bergen jaýabynda málim etti.
Komıtettiń málimetinshe, ózgerister «Investorlardyń quqyqtaryn qorǵaý jáne aktıvterdi qaıtarý salasynda memlekettik basqarý júıesin jetildirý týraly» Qazaqstan Respýblıkasy Prezıdentiniń 2025 jylǵy 17 jeltoqsandaǵy №1125 Jarlyǵyna sáıkes engizilip otyr.
– Beriletin fýnktsııalar men ókilettikterdiń sheginde Komıtettiń quqyqtary men mindettemeleriniń quqyqtyq mırasqory bolyp Bas prokýratýra aıqyndaldy. Onyń qurylymynda Aktıvterdi qaıtarý jónindegi qyzmeti quryldy, – delingen jaýapta.
Vedomstvonyń habarlaýynsha, osyǵan baılanysty Qazaqstan Respýblıkasy Bas prokýrorynyń 2023 jylǵy 11 qazandaǵy №186 buıryǵymen bekitilgen Aktıvti ıemdený (paıda bolý) kózderiniń zańdylyǵyn tekserýdi taǵaıyndaý jáne júrgizý qaǵıdalaryna ózgerister engizý jónindegi buıryq jobasy ázirlengen.
Qujatty Bas prokýratýranyń Aktıvterdi qaıtarý jónindegi qyzmeti daıyndaǵan. Jobaǵa sáıkes, aktıvterdiń zańdy shyǵý kózderin tekserýdi bastaý jáne júrgizý tártibi naqtylanady. Máselen, tekserýge bastamashylyq jasaý quqyǵy aktıvterdi qaıtarý jónindegi qurylymdyq bólimsheniń qyzmetkerlerine beriledi. Al tekserý júrgizý týraly qaýly buryn ýákiletti organ basshysy nemese onyń orynbasarlary deńgeıinde qabyldansa, endi mundaı sheshimder qurylymdyq bólimshe basshysy nemese onyń orynbasary deńgeıinde qabyldanýy múmkin.
Sonymen qatar tekserý rásimderiniń birqatary naqty reglamentteledi. Mysaly, tekserý tobynyń quramyn, tekserý nysanasyn nemese kezeńin ózgertý aktıvterdi qaıtarý jónindegi jumysqa jetekshilik etetin Bas prokýrordyń orynbasarymen kelisý arqyly júzege asyrylady. Al tekserý nátıjeleri boıynsha jasalatyn anyqtama tıisti qurylymdyq bólimshe basshysymen kelisilip, keıin Bas prokýrordyń orynbasaryna baıandalady.
Budan bólek, tekserýler barysynda qajet bolǵan jaǵdaıda prokýratýra organdarynyń basqa qurylymdyq bólimsheleriniń, sondaı-aq áskerı jáne kólik prokýratýralarynyń qyzmetkerlerin tartý múmkindigi qarastyrylǵan. Máselen, kúrdeli qarjylyq operatsııalar nemese sheteldegi aktıvterge qatysty tekserýler júrgizilgen jaǵdaıda qosymsha sarapshylar men mamandardy tartý kózdeledi.
– Jobamen Aktıvterdi qaıtarý jónindegi qyzmetiniń tekserýge bastamashylyq jasaý, ony taǵaıyndaý jáne júrgizý tártibin retteıtin jekelegen normalar naqtylanady. Quqyqtyq aıqyndyq maqsatynda jáne aıaqtalmaǵan tekserýler boıynsha shaǵym jasaý táýekelderin boldyrmaý úshin buıryq jobasyna keri kúsh berý usynylady, – dep atap ótti komıtet.
Buǵan deıin Bas prokýror 2026 jylǵy 6 qańtardaǵy buıryǵymen Bas prokýratýranyń Aktıvterdi qaıtarý qyzmeti týraly erejeni bekitken edi.