Kúrd qurylymdary Aleppodaǵy aýdandardan áskerin shyǵarýdan bas tartty

ASTANA. KAZINFORM — Aleppoda atysty toqtatý jarııalandy, biraq onyń sharttaryn árkim ártúrli túsinip otyr, dep habarlaıdy Kazinform agenttiginiń tilshisi.

Sheıh-Maksýd pen Ashrafııa aýdandaryndaǵy kúrd kúshteri Damask úkimetiniń qaladaǵy áskerin shyǵarýǵa shaqyrǵan talabyn oryndamaıtyndaryn aıtty. Bul týraly juma kúni sol aýdandardaǵy jergilikti kúrd keńesteri habarlady.

Keńesterdiń habarlamasynda áskerlerdi shyǵarý shaqyrýlary «tabandy berilýge shaqyrý» dep sıpattalǵan jáne jergilikti kúshter óz aýdandarynda qalyp, ony qorǵaýdy jalǵastyratyny atap kórsetilgen. Kúrdter tarapy úkimet kúshterin qarqyndy oq atty dep jáne beıbit turǵyndarǵa qysym jasaǵan dep aıyptady.

Sırııalyq demokratııalyq kúshterdiń (SDS) saıası qanaty — Sırııalyq demokratııalyq keńestiń ókili Sınam Mohamad ta kúrd saıası qurylymdarynyń ustanymyn bildirdi. Ol Rudaw telearnasyna bergen suhbatynda Sırııa bıliginiń áreketteri Aleppodaǵy kúrd kvartaldaryn baqylaýǵa alý jáne olardyń demografııalyq quramyn ózgertýge baǵyttalǵanyn atap ótti.

— Sırııa úkimetiniń maqsaty — Ashrafııa men Sheıh-Maksýdtaǵy kúrd kvartaldaryn bosatyp, olardyń demografııasyn ózgertý. Bul óte qaýipti, — dedi ol.

The Syrian government is seeking to change the demographic composition of Kurdish-majority neighborhoods in Aleppo by seizing control of them and displacing their indigenous residents, according to a Kurdish official.https://t.co/oaLmUnKeKM

— Rudaw English (@RudawEnglish) January 9, 2026

Onyń aıtýynsha, Ashrafııa aýdanynyń bir bóligi qazir Damaskpen baılanysty kúshterdiń baqylaýyna ótken, al negizinen kúrd turǵyndary turatyn kvartaldar «Asaıısh» SDS ishki qaýipsizdik kúshteriniń baqylaýynda qalyp otyr. Sondaı-aq, ol qarýly qaqtyǵystardyń qarqyndy bolýy keıbir turǵyndy aýdandardan evakýatsııalanyp, Afrın jaqqa ketýge májbúr etkenin aıtty.

Sonymen qatar, Aleppo bıligi atysty toqtatý sharttaryn is júzinde júzege asyrýǵa daıyn ekenin málimdedi. Provıntsııa ákimshiligi «Asaıısh» kúrd ishki qaýipsizdik kúshteriniń qyzmetkerlerin jeńil qarýmen birge Efrat ózeniniń shyǵysyndaǵy aýdandarǵa evakýatsııalaý úshin avtobýstar daıyndap jatqanyn, sondaı-aq Ashrafııa men Sheıh-Maksýdtaǵy memlekettik mekemelerdiń jumysyn qalpyna keltirýge nıetti ekenin habarlady.

Sonymen qatar, provıntsııa ákimshiliginiń málimdemesinde qaýipsizdikti qamtamasyz etý, joldardy tazalaý jáne jarylǵysh zattardy joıý operatsııalary aıaqtalǵannan keıin ǵana beıbit turǵyndardyń aýdandarǵa qaıtarylýy úılestiriletinin aıtylǵan. Turǵyndarǵa osy jumystar tolyq aıaqtalǵanǵa deıin aýdandarǵa qaıtyp barmaýǵa keńes berilgen.

Budan buryn Sırııa Qorǵanys mınıstrligi habarlaǵandaı, atysty toqtatý rejımi Aleppodaǵy soltústik aýdandardyń keıbirinde áskerı shıelenistiń odan ári órshýine jol bermeý jáne beıbit turǵyndardyń oralýyna jaǵdaı jasaý maqsatynda engizilgen. Mınıstrlik qarýly qurylymdardy belgilengen merzimde aýdandardan shyǵýǵa shaqyryp, bul protsestiń qaýipsizdik kúshteriniń baqylaýynda ótýi kerektigin atap kórsetti.

Osyǵan qaramastan, kúrd tarapy Aleppodaǵy kvartaldardaǵy óz kúshterin saqtap qalýdy talap etip otyr jáne aýdandardan shyǵý jónindegi talapty qabyldaýǵa bolmaıdy dep esepteıdi.

Sonymen qatar, Aleppoda qarýly qaqtyǵystar ýshyǵyp, juma kúni atysty toqtatý rejımi engizilgen.